بۆ بەڕێز نەوشیروان مستەفا...گۆڕان تەنها دوو ڕێگای لەبەردەمدایە!!/ ئارام ئەحمەد

به‌شی: وتارو بیروڕا
2015-01-14 23:55:16
_______________________________________________________________________________
یەکەم کەسانێکم کە دژی ئەوە بووم بزوتنەوەی گۆڕان بچێتە ناو حکومەتێک،کە هەرگیز حکومەت نەبوەو تەنها دوو باندی مافیا سەرقاڵی دابەشکردنی زەویەکانی کوردستان و سامانەکەی بوون،بە جۆرێکیش ئەم حکومەت و دەسەلاتە بۆگەن و قوڕو لیتەیە باشترین مەلەوان تێیدا دەخنکێت وناتوانێ یەک هەنگاو بنێت،

ئەوەی یەکێتی و پارتی خراپیان کردوە بە کەس چاک ناکرێتەوە،خۆ ماندو کردن تەنها بەدناوکردنی خودەو بەس،گۆڕان نەدەبوو بە هیچ جۆرێک بەشداری دەعبایەک بکات کە بە خۆڕایی ناویان ناوە حکومەت و حوکمڕانی. ئەگەر بزوتنەوەی گۆران،وەزیرو کاربەدەستەکانی هەرچی ئەرشیفی پیسی یەکێتی وپارتی هەیە بە بەڵگەی بینراو بیسراو یاساییەوە بخەنە ڕوو،یەکێتی و پارتی لە زوڕناژەندنی خۆیان ناکەون،ئەوان بەشێکی فراوانی کۆمەڵگایشیان لەگەڵ خۆیاندا بەشدار پێکردوە لەگەنەخۆریدا.   لە هەموودنیادا سێ ڕێگا هەیە بۆ ئاڵوگۆڕ لە کۆمەگا جیاجیاکاندا،   1- لە ڕێگای سندوقەکانی دەنگدانەوە!.....کە ئەم ڕێگایە لەژێر سایەی یەکێتی وپارتی و تەدەخولی ئێران و عێراق و تورکیادا ماهیەتی خۆی لەدەست داوەو ئەم ڕێگایە هیچ ئۆپۆزسیۆنێک ناگەیەنێتە هەوارێکی خاوین وباش.   2- بە ڕێگای کودەتای سەربازی!....لە کوردستان لەشکرێکی کوردستانی نییەو ئەوەی هەیە میلیشیای حیزبییەوە لەناو حیزبەکانیشدا دابەش بوون بەسەر دەیان گروپدا،بەم مانایە ئەم ڕێگایەش هیچ نادات بەدەستەوەو ڕێگایەکی بونبەست و گیراوە.   3- بە ڕێگای شۆڕش وهەڵگەڕانەوە.....ئەم ڕێگایەش لانی کەم لەم قۆناغەدا ناکرێت چونکە هەم کۆمەڵگا بۆی ئامادە نییە،هەم هەلومەرجی کوردستان و ناوچەکە ئەمە هەڵناگرێت و ئەوەندەی تر وێرانە دەخولقێنیت. کەواتە ئەوەی دەمێنێتەوە تەنها ئۆپۆزسیۆن بوونە تا زەمینە سازکردن بۆ هەر ڕێگایەک لەوڕێگایانەی سەرەوە.   ئێستاش بەڕای من بزوتنەوەی گۆران دوو ڕێگای لەبەردەمدایە     1- قاچێکی لەدەرەوە وەک ئۆپۆزسیۆن بێت وقاچێکی لەناو ئەو دەسەڵاتە بۆگەنەدا،بێدەنگی بزوتنەوەی  گۆڕان بەتەواوی مانا کارەساتەو سەری ئەو بزوتنەوەیە دەکات بە قوڕێکی واخەستا هەرگیز قاچی لێی دەرنایەتەوە،بە هیچ جۆرێک نابێت گۆڕان وهەڵسوڕاوەکانی پشت بکەنە جەماوەرو دەبێت لە ناویاندا بمێننەوەو پاڵپشتی هەموو داواکاریەکانیان بن،پێویستە وەڵامی هەر پێشێلکاریەک بداتەوەو بەرامبەر یەکێتی وپارتی ڕابوەستێت و لە قاویان بدات و مزایدەکانیان  وەک میزەڵدانێکی بە درۆ فودراو بە دەرزیەک فش بکاتەوەو وەلامی هەرقسەو کردارو هەنگاوێکیان بداتەوە،سەرۆکی پەڕلەمان،وەزارەتی پێشمەرگە، وەزارەتەکانی ترو ئەوانەی بەغدا،ئەم چەند سالە یەکێتی و پارتی چیان کردوە،چیان دزیوە،هەموو بڵاو بکەنەوەو  بەرامبەر بچوکترین چەتەیی و دزی گەندەڵی بێدەنگ نەبن و تێکڕای کۆمەڵگا تێبگەیەنن،بە خەڵک بڵێن  ئەم قەیرانە ئابورییە بۆچی یەخەی بە کۆمەڵگای کوردی گرتوەو خولقێنەرەکانی کێن وچۆن چارەسەر دەبێت.   2-  یان بە زوترین کات بەیان نامەیەک دەربکەن و ئیعلانی کشانەوەی خۆتان لەم حکومەتە قۆڕە ڕابگەیەنن و ڕوو بە کۆمەڵگا ئەوخاڵانە بخەنە ڕوو،کە دەبێتە هۆی وازهێنان ودوور کەوتنەوە لەو دەسەڵاتەو، هاتنەوە ناو ساحەکە وەک ئۆپۆزسیۆنێکی کارا.

ئه‌م بابه‌ته‌ 1644 جار بینراوه‌