Chawi Gal - کێ کاوە گەرمیانی تیرۆرکرد؟!/ئارام ئەحمەد

 کێ کاوە گەرمیانی تیرۆرکرد؟!/ئارام ئەحمەد

به‌شی: وتارو بیروڕا
2015-01-06 10:12:12
_______________________________________________________________________________
کاتێک کاوە گەرمیانی تیرۆر کرا،زۆر بە خێرای دەزگای زانیاری و دژە تیرۆر واتە خەسرەوی گوڵ محەمەدی خۆی گەیاندە ماڵی کاوەو ئەو دەورو بەرە،هەرچی کامێرای شەقامەکان و هەتا دواییە کۆیکردەوەو گوای سەرەداویان دەست کەوتوە،هەرئەوکاتە ڕام گەیاند، مادام خەسرەو گەیشتە ئەوێ ئەوە تەنها بۆ ونکردن و دیزەبەدەرخۆنە کردنی کەیسی کوشتنەکەیە،ئاقیبەت هەروایش دەرچوو.

وەختێک کاوە تیرۆر کرا،چونکە پێشتر کێشەی لەگەڵ مەحمود سەنگاوی هەبوو، کۆمەڵێ جوێنی پێدابوو،هەڕەشەی لێکردبوو، رووی هەموومان لە مەحمود سەنگاوی بوو کە  ئەو کاوە گەرمیانی تیرۆرکردوەو لەسەرئەمە زۆربەی کۆمەڵگاو چاودێران ڕاوەستابوون و یەک لاییان کردبوەوە.   ئەوەی کە مەحمود سەنگاوی ئاوا دڕو هار کردبوو،وەک  گیانلەبەرێکی هار بەری دابووە خەڵک،تەنها یەک ئەقڵیەتی باو بوو،ئەو چونکە وەک کوڕە نەخوێنەوارێک لە پێشمەرگایەتییەوە دەستی پێکردبوو، نەیدەزانی ئەلفوبێی سیاسی چییە،شارەزای فرتو فێڵو ملشکاندنەکان نەبوو، وایدەزانی هەتا بدزێ و بکوژێ وتالان وتەعدا لە خەڵک بکات  حیزب لە پشتیەتی و دەیپارێزێت،بێئاگا لەوەی ڕۆژێ دێت حیزب خۆی دەیخاتە داو دەیکاتە قوربانی وکلکی دەبێت بە تەڵەیەکەوە نەجات بوون لێی زەحمەتە،ئەگەر ئەمڕۆیش لەسەرکەیسی کاوە ڕزگاری بێت ئاقیبەت باجی خراپەکاریەکانی خۆی دەدا. زۆر لە مێژە بنووسی ئەم چەند پەرەگرافە هاواری کرد،یەکێتی بۆتە گروپی مافیا،وەک عەسابەکان و فلیمی کابۆیی ڕەفتار دەکات،ڕۆژێ دادێ دوای هەرچی دزینی پارەیە،بەردەبنە یەکترو یەکتر دەخۆن و ئیسکی یەک دەشکێنن،ئەمە هەردێتە دی ئەگەر ئەمرۆیش نەبێت سبەینێ هەیە.   ئێستا ئیتر من باوەڕم گۆراوەو پێچەوانەی زۆربە بیردەکەمەوە،وایدەبینم بکوژی کاوە مەحمود سەنگاوی نییە،بەڵکو باڵی دەست ڕۆیشتووی ناویەکێتییە بەتایبەت دەزگای دژە تیرۆر،کاوە بوو بە قوربانی کێشمە کێشی بالەکانی ناو یەکێتی،گومانم نییە ئەگەر هەرئێستا مەحمود سەنگاوی بچیتە لای باڵی هێرۆ، لەسەرتیرۆری کاوە هیچ کێشەیەکی بۆ پێش نایەت،وەلێ تا دوور کەوێتەوە مەلەفی تیرۆری شەهید کاوە دەخرێتەوە سەرمێز،من باش ئاگادارم جاری پێشو ئاگاداریان کردبوو بێدەنگ دانەنیشێت مەلەفەکەی کاوە دەجوڵێنن. با کەس واتێنەگات کە جوڵاندنی ئەم مەلەفە لە بەرخاتری  کاوە گەرمیانیە،یان یاسا ڕۆڵی خۆی دەبینیت، نە،،سەلەبەری کێشمەکێشی سیاسی و شەڕی بالەکان لە پشتیەتی و دەیجوڵێنێت،ئەسڵەن  کاوە گەرمیانی بووە قوربانی شەڕی ناو بالەکانی  یەکێتی.

ئه‌م بابه‌ته‌ 604 جار بینراوه‌