دەقی نامەکەی ڕیحانە جەباری بەر لە سێدارە دان

به‌شی: بابه‌تی هه‌ڵبژارده‌
2014-10-28 18:00:15
_______________________________________________________________________________
خۆشه‌ویستم (شوعله‌) :ئه‌مڕۆ زانیم كه‌ سه‌ره‌م هاتووه‌ بۆ ڕوبه‌ڕوبونه‌وه‌ی له‌سێداره‌دان، بێتاقه‌تم به‌وه‌ی كه‌ تۆ پێت نه‌وتم كه‌ گه‌شتومه‌ته‌ كۆتایی گه‌شته‌كه‌م له‌ ژیانمدا، هه‌ست ناكه‌یت مافی خۆمبوو كه‌ بزانم؟ ئه‌زانی؟ بێتاقه‌تم بۆ ئه‌وه‌ی كه‌ تۆ بێتاقه‌تی، بۆچی ده‌رفه‌تێكت نه‌دامێ تاده‌ستی تۆ و باوكم ماچكه‌م؟


19 ساڵ له‌م جیهانه‌دا ژیام، له‌و شه‌وه‌ شومه‌دا ده‌بوایه‌ من كوژراو بومایه‌ و لاشه‌كه‌م له‌سوچێكی شاردا فڕی بدرایه‌، دوای چه‌ند ڕۆژێكیش پۆلیس تۆی ده‌برد بۆ دادوه‌ری پزیشكی بۆ ئه‌وه‌ی لاشه‌كه‌م بناسیته‌وه‌، ئه‌و كاته‌ش تۆ ده‌تزانی كه‌من ده‌ستدرێژی سێكسیم كراوه‌ته‌ سه‌ر، كه‌سیش نه‌ده‌گه‌یشت به‌ بكوژه‌كه‌، چونكه‌ ئێمه‌ ئه‌و پاره‌ و نفوزه‌ی ئه‌وانمان نییه‌، ئه‌و كاته‌ش ئه‌وه‌ی له‌ژیانتدا مابوو به‌ ناخۆشی حه‌یاچوندا به‌سه‌رت ده‌برد، دوای چه‌ند ساڵێكیش به‌ بێده‌نگی ده‌مردیت و چیرۆكه‌كه‌ كۆتای پێده‌هات.
به‌ڵام چیرۆكه‌كه‌ به‌ لێدانێكی نه‌عه‌له‌تی گۆڕانی به‌سه‌ردا هات و جه‌سته‌كه‌م فڕێنه‌درا، به‌ڵكو كه‌وته‌ گۆڕستانی زیندانی (ئه‌وین) و ژوره‌ تاكه‌ كه‌سییه‌كه‌یه‌وه‌"، ئێستاش له‌ زیندانی (شهر ری)م كه‌له‌گۆڕێك ده‌چێت و، ته‌سلیمی قه‌ده‌ر بوم و سكاڵا ناكه‌م، چونكه‌ تۆ له‌من باشتر ده‌زانیت كه‌ مردن كۆتایی نییه‌.
له‌تۆوه‌ فێربوم كه‌ مرۆڤ بۆیه‌ له‌م جیهانه‌دا له‌دایك ده‌بێت بۆ ئه‌وه‌ی ئه‌زمون وه‌ربگرێت وانه‌فێربێت، فێربوم كه‌ ده‌بێت مرۆڤ هه‌ندێ جار بجه‌نگێت، له‌بیرمه‌ كاتێك پێتوتم شۆفێری ئوتومبیله‌كه‌ ناڕه‌زای ده‌ربڕیوه‌ به‌رامبه‌ر به‌و پیاوه‌ دڕنده‌یه‌ی لێیداوم، به‌ڵام دڕنده‌كه‌ به‌ قامچی له‌سه‌ر و ده‌موچاوی داوه‌، دواتر به‌ كاریگه‌ری ئه‌و لێدانه‌ مردووه‌، پێت وتم كه‌ پێویسته‌ مرۆڤ تێبكۆشێت بۆ ئه‌وه‌ی به‌های خۆی به‌رز ڕابگرێت، ته‌نانه‌ت ئه‌گه‌ر پاداشته‌كه‌شی مردن بێت.
كاتێك چومه‌ قوتابخانه‌ له‌تۆوه‌ فێربوم كه‌ ڕه‌وشتێكی به‌رزم هه‌بێت و به‌ڕووی شه‌ڕ و سكاڵادا بوه‌ستم، له‌بیرته‌ چه‌ند زۆرت لێده‌كردم بۆ ئه‌و ڕێگایه‌ی كه‌ پێویسته‌ مامه‌ڵه‌ی له‌گه‌ڵدا بكه‌م، ئه‌زمونه‌كانت هه‌ڵه‌بوو، كاتێك كاره‌ساته‌كه‌ ڕویدا مه‌بده‌ئه‌كه‌م یارمه‌تی نه‌دام، كاتێك خرامه‌ به‌رده‌م دادگا گۆڕام بۆ ژنێكی بكوژ، تاوانبارێك كه‌ هیچ به‌زه‌ییه‌كی نییه‌، ته‌نانه‌ت فرمێسكێكیش له‌چاوم نه‌هاته‌ خواره‌وه‌، له‌ كه‌س نه‌پاڕامه‌وه‌، نه‌گریام چونكه‌ من متمانه‌م به‌ یاسا هه‌بوو.
به‌ڵام من به‌ تاوانه‌كه‌ تاوانبار كرام، ده‌بینیت، ته‌نانه‌ت مێروشم نه‌ده‌كوشت، قالۆنچه‌كانم به‌ هه‌سته‌وه‌ره‌كانی هه‌ڵده‌گرت و بۆ دور فڕێم ده‌دان، له‌نێوان شه‌و و ڕۆژێكدا بومه‌ بكوژ، به‌شێوه‌یه‌كی جیاواز مامه‌ڵه‌ی منیان له‌گه‌ڵ گیانه‌وه‌ره‌كان ده‌خوێنده‌وه‌ وه‌ك ئه‌وه‌ی نێرابم، دادوه‌ره‌كه‌ ئه‌و ڕاستییه‌ی نه‌بینی كه‌ من له‌و كاته‌دا نینۆكه‌كانم درێژبوو تیژبوون.
زۆر گه‌شبین بووم به‌وه‌ی چاوه‌ڕێی یاسا بكه‌م له‌ دادوه‌ره‌كانه‌وه‌، دادوه‌ره‌كه‌ گوێ به‌ ناسكی ده‌سته‌كانم نه‌دا، كه‌ ئه‌مه‌ له‌ده‌ستی ژنێكی وه‌رزشه‌وان ناچێت، ئه‌و وڵاته‌ی خۆشه‌ویستم تیا چاندبوو خۆشه‌ویستی بۆم نه‌بوو، كه‌سیش یارمه‌تی نه‌دام كاتێك له‌ژێر لێدانی لێكۆڵه‌ره‌وه‌دا بووم و چه‌ندین وشه‌ی نه‌شیاویشی پێده‌وتم، كاتێك هه‌موو جوانه‌كانی جه‌سته‌شم له‌ده‌ستدا به‌ تاشینی سه‌رم پاداشتیان كردم، یانزه‌ ڕۆژ له‌ زیندانی تاكه‌ كه‌سیدا هێشتمیانه‌وه‌.
ئازیزم شوعله‌
مه‌گری به‌م شتانه‌ی گوێت لێده‌بێت، له‌یه‌كه‌م ڕۆژمدا له‌ بنكه‌ی پۆلیس ئه‌فسه‌رێكی به‌ته‌مه‌ن كه‌ خێزاندار نه‌بوو، به‌هۆی نینۆكه‌كانمه‌وه‌ ئازاریدام، له‌و كاته‌دا زانیم كه‌ جوانی یه‌كێك نییه‌ له‌ سیماكانی ئه‌م سه‌رده‌مه‌، جوانی شێوه‌، جوانی بیر و هیوا، جوانی خه‌ت، جوانی چاو و سه‌یركردن، جوانی ده‌نگ.
دایكی خۆشه‌ویستم
فه‌لسه‌فه‌كه‌م گۆڕاو تۆش به‌رپرس نیت، وشه‌كانم ته‌واو نابن بۆیه‌ داومه‌ به‌كه‌سێكی دیكه‌، تادوای له‌سێداره‌دانم بتداتێ و بێ ئه‌وه‌ی تۆی ئاماده‌ بیت، بێ ئه‌وه‌ی بزانیت، زۆر نوسینم به‌ میراتی بۆ جێهێشتویت.
به‌ڵام پێش ئه‌وه‌ی بمرم، ده‌مه‌وێت داوایه‌كت لێبكه‌م، كه‌ ده‌بێت به‌ هه‌موو توانای خۆت و جێبه‌جێی بكه‌یت، ئه‌مه‌ تاكه‌ شته‌ كه‌ له‌م جیهانه‌دا ده‌مه‌وێت له‌ تۆ و له‌م وڵاته‌، ده‌زانم كاتت ده‌وێت بۆ ئاماده‌كردنی بۆیه‌ به‌شێك له‌ وه‌سێته‌كه‌ی خۆی بۆ ئاشكرا كردی پێش ئه‌وه‌ی بمرم، مه‌گری و باش گوێم بۆ بگره‌، ده‌مه‌وێت بچیته‌ هۆڵی دادگا و ئه‌م حه‌زه‌م ڕابگه‌یه‌نیت، چونكه‌ ناتوانم ئه‌م حه‌زه‌م له‌ناو زینداندا بنوسم، به‌ڕێوبه‌ری زیندانه‌كه‌ش ڕێگه‌ به‌ تێپه‌ڕینی ئه‌م حه‌زه‌م نادات، بۆیه‌ جارێكی دیكه‌ له‌پێناوی مندا هیلاك ده‌بیت، ئه‌مه‌ ئه‌و شته‌یه‌ كه‌ گه‌ر بۆشی بپارێیته‌وه‌ توڕه‌ نابم، هه‌رچه‌نده‌ من چه‌ند جارێك داوام لێكردویت كه‌ له‌كه‌س نه‌پاڕێیته‌وه‌ بۆ ڕزگار كردم له‌ په‌تی سێداره‌.
دایكی خۆشه‌ویستم، ئازیزم شوعله‌، ئازیزتر له‌ ژیانم
نامه‌وێ بچمه‌ ژێر گڵ، نامه‌وێ دڵ و چاوه‌ گه‌نجه‌كه‌م ببێته‌ خۆڵ، لێیان بپاڕێره‌وه‌ كه‌ دڵ و گورچیله‌ و چاو، ئێسكه‌كانم، وه‌هه‌ر ئه‌ندامێكم كه‌ ده‌توانرێت بۆ كه‌سێكی دیكه‌ بچێنرێت، پێشكه‌شی كه‌سێكی بكه‌ن كه‌پێویستی پێی بێت، نامه‌وێ ئه‌و كه‌سه‌ش ناوم بزانێت، یان چه‌پێك گوڵم بۆ بكرێت، ته‌نانه‌ت ناشمه‌وێت نزام بۆ بكات، له‌ دڵمه‌وه‌ پێت ده‌ڵێم كه‌ نامه‌وێت بخرێمه‌ گۆڕێكه‌وه‌ سه‌ردانی بكه‌یت و له‌سه‌ری بگریت و خه‌فه‌ت بخۆیت، ناشمه‌وێ جلی ڕه‌شی پرسه‌م بۆ بپۆشیت، هه‌موو هه‌وڵێكی خۆیت بده‌ بۆ ئه‌وه‌ی ڕۆژه‌ قورسه‌كانم له‌بیر بكه‌یت.
جیهان خۆشینه‌ویستین، قه‌ده‌ریش وازی لێنه‌هێنام، من ئێستا خۆم ده‌ده‌م به‌ده‌سته‌وه‌، به‌سنگێكی فراوانه‌وه‌ به‌ره‌و ڕووی مه‌رگ ده‌ڕۆم، له‌به‌رده‌م دادگای خوادا ڕوبه‌ڕووی پشكنه‌ره‌كان ده‌بمه‌نه‌وه‌، تۆمه‌ت ئاڕاسته‌ی پشكنه‌ر (شاملۆ) ده‌كه‌م، تۆمه‌ت ئاڕاسته‌ی دادوه‌ر ده‌كه‌م، هه‌روه‌ها دادوه‌ری دادگای باڵا كه‌لێیدام كاتێك به‌ئاگا بوم، هه‌روه‌ها گێچه‌ڵیان پێده‌كردم، له‌به‌رده‌می خوادا تۆمه‌ت ئاڕاسته‌ی (فرۆندی) پزیشك ده‌كه‌م، هه‌روه‌ها (قاسم شعبانی)، هه‌موو ئه‌وانه‌ی كه‌ سته‌میان به‌رامبه‌ر كردم و مافه‌كانمیان پێشێلكرد، جا به‌ نه‌زانی بوبێت یان به‌ درۆ، گرنگیان به‌وه‌ نه‌دا كه‌ ڕاستی چۆنه‌.
ئازیزم شوعله‌، ئه‌ی خاوه‌نی باشترین دڵ
له‌كۆتایدا ئێمه‌ تاوانیان ئاڕاسته‌ ده‌كه‌ین و ئه‌وان تاوانبار ده‌بن، با چاوه‌ڕێی ئیراده‌ی خوا بین، له‌وێ باوه‌شت پێدابكه‌م تا ئه‌مرم، خۆشم ده‌وێیت.
ڕێحانه‌
1/4/2014
سه‌رچاوه‌: كه‌ی ئێن ئێن ریحانه‌ جه‌باری ئه‌و كچه‌ گه‌نجه‌ی‌ له‌پێناو به‌رگریكردن له‌شه‌ره‌فی خۆی كه‌سێكی‌ كوشت، دواتر له‌سێدراه‌درا،

ئه‌م بابه‌ته‌ 805 جار بینراوه‌