مەلا بەختیار، كە ئێستا سەرپەرشتی كۆبونەوەكانی كۆمیتەی سەركردایەتی یەكێتی نیشتمانی كوردستان دەكات‌و لێپرسراوی دەستەی كارگێڕی مەكتەبی سیاسی یەكێتییە، بۆ یەكەمجار لەدوای بۆشایی یاسایی سەرۆكایەتی هەرێم‌و كۆتایی خولی سەرۆكایەتی، بارزانی وەك سەرۆكی هەرێم ناوبرد.

مەلا بەختیار وتی” مرونەت لە باشوروە لە دەسەڵاتی باشوروە لە پەرلەمان‌و حكومەتی باشوروە لە سەرۆكی ئێستای هەرێمی كوردستانبۆ بەشەكانی تری كوردستان مەسئولیەتە ئێستا”.

مەلا بەختیار كە لیژنەی بۆ هەمواركردنەوەی یاسای سەرۆكایەتی لە ئەكادیمیایی بیروهۆشیاری دروستكرد، دواجار پرۆژەی لیژنەكەی لە دەستەی كارگێڕ پەسەندكرد، هەر خۆی دای بە فراكسیۆنی سەوزو ئەوانیش پێشكەشی پەرلەمانیان كرد، بیری چوە كە لە پرۆژەكەیدا، نوسیویەتی مەرجی سەرۆكی هەرێم ئەوەیە كە نابێ هاوكاری رژێمی بەعسی كردبێ!؟ بیری چوە نوسیویەتی دەبێ لە پەرلەمانەوە هەڵبژێردرێ!؟ بیری چوە نوسیویەتی دەبێ شەهادەی هەبێت!؟

ئەی ئەگەر ئەمانەت بۆ مەسعود نەنوسیوە، بۆ كێت نوسیوتە؟؟ ئەی خێرە بە هەڕەشەیەك وەك هەڕەشەكەی میحوەری رۆژئاوای دیجلەو بەزمی هاتنی حەشدی شەعبی، سەدو هەشتا دەرەجە با ئەدەیتەوە، ئەو سەرۆكە پیرۆزی خۆت‌و كاری گێڕت بێت.

ئەو نزاو دەستە نەزرو لاڵانەوەیەت بۆكێیە كە دەڵێیت” ئازار دراویت، ئەزانم، رەخنەت لێگیراوە، ئەزانم، كێشەی گەورە دروستكراوە، ئەزانم، ئەو شەوەی نەتەوە یەكگرتوەكان‌و ئەمەریكا‌و پێنج حیزب دانیشتوین سەرۆكی پەرلەمان بەقسەی نەكردوین، ئەوە ئەنجامەكەی، یەكێك لە هۆیە سەرەكییەكانی ئەوە ئەنجامەكەیەتی كە هەیە، وە هەمو فراكسیۆنەكان هەڵەیان كرد بە فراكسیۆنەكەی یەكێتیشەوە، فەرمو ئەڵێن پەرلەمان ئەتوانێت بەبێ حیزبەكان قەرار بدات، بڕۆ قەرار بدە، ئاوای بەسەردێت”.

بەڵێ ئازارمانداوە، بەڵێ رەخنەمان گرتوە، بەڵام شتی شەخسی‌و كۆنەقین نەبوە، ئەوە رای پێنج فراكسیۆنی زۆرینەی پەرلەمانین‌و مەسەلەی هەق‌و عەدالەت‌و جێبەجێكردنی یاساو بنەماكانی دیموكراسییە، تۆ بەدەلەسەو فیشاڵ ساڵانێكە بانگەشەی بۆ دەكەیت‌و دوای منداڵی وەرەسەی سەرۆكەكەكەت دەكەویت.

داوای چارەسەری كێشە لەبارزانی دەكەیت ؟

مەلا بەختیار وتی” سەرۆكایەتیت دەوێت، دەی فەرمو سەرۆكبە‌و موشكیلە حەل بكە، بۆ حەل ناكەیت، موشكیلەی باشور حەلكە، ئەتوانی حەلی كەیت”.

چارەسەری ئەو كێشەیە یاساو هەمواركردنەوەی یاساو جێبەجێكردنی یاساو گۆڕینی سیستەمی حوكمڕانییە، وەك فراكسیۆنی یەكێتی‌و رۆشنبیرەكانی ناو یەكێتی بانگەشەی بۆ دەكەن، نەك تۆ كە وەك ئەوە وایە داوا لە میوانە سۆشیال عەشایەرەكانی دیوەخانەكەت بكەیت.

دواجار سەرۆكە ناشەرعیەكەت بێبەری دەكەیت لە تاوانی پەكخستنی پەرلەمان‌و دامودەزگا شەرعییەكان‌و هەمو ئەو نەهامەتیانەی یانزە ساڵە بەسەر هەرێمەكەماندا هێناویەتی‌و دەڵێیت” لێرە دانیشتوە ئەڵێ خۆ ئێمە قازنین بەقسەی حیزبەكانمان بكەین، ئەی جەنابت كێ هێنایتی بۆ پەرلەمان، دەی بۆ خوت هەڵنابژێریت بەتاقی تەنها‌و دەرچیت، ئەگەر قازنیت، بۆ ناچیتەدەرەوە ئەم حیزبە ئیشی خۆت بكەی؟”

ئەمە قسە زۆر هەڵدەگرێت هەمو ئەوانەی لە یەكێتیدا كاری سیاسییان كردوە دەزانن كە ئەوە قسەی مام جەلالە كە لەدەیان كۆبونەوەدا بە كادرو پەرلەمانتارانی وتوە” ئێوە قازنین ئێمە هەرچیمانوت بەدواماندا بیڵێنەوە”، بەڵام تۆ دەتەوێت بەبەردێك هەردو نیشانەكە بشكێنیت، هەم بە ئەندام پەرلەمانەكان بڵێیت ئێوە قازی بارزانین‌و خۆشت بە شوانی قازەكان بچوێنیت، هەم تەعنی مەبدەئێكی مام جەلال بكەیت، كە تەعریفی تۆی لە زۆر مناسەبەدا كردوەو تازەترینیان ئەوەیە كە رۆژنامەكەی مەسرور بارزانی بۆی بڵاوكردیتەوە كە لە نامەیەكدا دەڵێت” مەلا بەختیاری لەخۆبایی‌و قول گیراو”…

مایەی سەرسوڕمانە دوای ئەو هەمو ساڵە جارێكی تر قولت ئەگیرێتەوە، بەڵام ئەمجارە لای مام جەلال‌و یەكێتی نا، لەلایەن پارتی‌و پاراستنی پارتییەوە.

دواجار دەڵێی پەرلەمان بەقسەمان نەكات ئاوای لێدێت” هاتوین ئەڵێین هەفتەیەك مەجالمان بدەنێ، موشكیلەكانت حەلكەین، نەتكرد، ئەوە لە گیرێژنە دەرچو، بڕۆ قەرار بدە ئاوات بەسەردێت”..

وەك ئەوەی هەڕەشەی نافرسەتی كارەساتەكانی گوندی كانی سوری دەشتی كۆیەو كانی ژەنانی هەورامان‌و  بزەینانی شارباژێڕو شێخ باخی دۆڵی جافایەتی دوبارەبكەیتەوە. ئۆخژنت بە پەكخستنی پەرلەمان دێ‌و خۆت بەسەر میكرۆفۆنەوە بائەدەی، دروست وەك سیاسییەكی موراهیق كە تەعریفی ئەندامێكی ئەنجومەنی ناوەندی حزبەكەی خۆتە بۆ تۆ.

تائێرە لێدوانی خۆی‌و هاوڕێكانی خۆی بو، ئەوەی كە بۆ ئێمە دەمێنێتەوە بێژینە ئەو، ئەگەر بۆ یەكجارو یەك دەقیقەی تر لەژێر نسێی یەكێتی قوڕباقە ئاسا لە گۆمی لیخنی ناخی خۆتەوە مل دەربهێنێ‌و بەقیڕەی ناوەخت ئارامی سلێمانیمان لێتێكبدەی، وەك خۆت بێدەنگ دەكرێی.

خۆ ئەگەر لە لۆقەی پاراستنی بەرژەوەندییەكانی خۆت‌و بارزانی سەرۆكتا، یەك تۆسقاڵە بەردی ژێر سمی دەست‌و ناڵی ژێر پێت بەر بزوتنەوەی گۆڕان بكەوێت، قسەی ترمان دەبێت.

تایبەتمەندییەکان: وتارو بیروڕا

زیادکردنی وەڵام