هێزەکانى سوریاى دیموکرات و تورکیا گەیشتنە رێککەوتن لەسەر ئەوەى سوپاى تورکیا لە ناو جەرابلوسەوە تەنها (15)کم بێتەناوە و هێزەکانى سوریاى دیموکراتیش بۆ رۆژهەڵاتى فورات بکشێنەوە.

ئێوارەی ئەمڕۆ سێشەممە، ئاگربەست و رێککەوتنى هێزەکانى سوریاى دیموکرات و تورکیا ئاشکرا کرا کە بە چاودێرى ئەمەریکا ئەنجامدراوە و بەپێى رێککەوتنەکە؛ تورکیا دەتوانێت تەنها (15)کم لە جەرابلوسەوە تا ئەعزاز بڕوات و هێزەکانى سوریاى دیموکرات بۆ رۆژهەڵاتى فورات دەکشێنەوە.

جۆن تۆماس، وتەبێژی فەرماندەیی ناوەندی هێزەکانی ئەمەریکا لەوبارەیەوە رایگەیاند: تورکیا و هێزەکانی سوریای دیموکرات ئاگربەستیان راگەیاندوە و هەردولا گرنکی بە شەڕی داعش دەدەن.

بەوتەی تۆماس، رێککەوتنەکە لەژێر چاودێری ئەمەریکادا بوە، واشنتۆنیش بەردەوام دەبێت لە پشتیوانی هێزەکانی سوریای دیموکرات بۆ روبەڕوبونەوەی رێکخراوی تیرۆریستی داعش و ئومێدی وایە رێکەوتنی نێوان تورکیا و لایەنگرانی لە سوپای ئازاد دریژەبکێشێت لەگەڵ سوریای دیموکرات و هەردولا تواناکانیان بۆ روبەڕوبونەوەی داعش بەکاربهێنن.

ئەوە لەکاتێکدایە؛ رۆژى چوارشەممەى رابردو سوپاى تورکیا بە تانک و زرێپۆش و هێزێکی تایبەتەوە پێشڕەوى ژمارەیەک چەکداری ئۆپۆزسیۆنی بەناوی سوپای ئازادی سوریاوە کرد بەرەو شارى جەرابلوسى تورکیا و بە ماوەی تەنها (103) خولەک کۆنترۆڵى کرد و لەماوەى رابردوشدا بۆردومانى چەند ناوچەیەکى کرد و دەیان هاوڵاتى مەدەنى کردە قوربانى، لە بەرامبەردا هێزەکانى سوریاى دیموکرات سێ تانکى سوپاکەیان تێکشکاند و (13) سەربازیان بەدیل گرت.

لەبارەى ئەو دۆخەشەوە دوێنێ ئەمەریکا نیگەرانى خۆى دەربڕى و رایگەیاند؛ ئەو شەڕ و پێکدادانانە قبوڵکراو نیە و جەختى کردەوە کە دەبێت هەموان هەوڵەکان بۆ شەڕى دژى داعش چڕ بکەنەوە.

تایبەتمەندییەکان: هەواڵەکان

زیادکردنی وەڵام