وەختێک ئێوە شارەزایتان لە دنیای نوسیندا نیە قسە مەکەن،لە خۆتانەوە وەڵام مەدەن، هەمیشە لە شتێک هەڵچن و قسەی تێدا بکەن کە شارەزایتان تێیدا هەبێت،نەزانین نە شورەییە نە ئیرادێکی گەورەیە،ئینسان کە زانی نازانێ هەوڵ دەدات کە بزانێت،وەلێ ئەگەر نەیزانی کە نازانێت، لە خۆڕا تەدەخول لە هەموو شتێکدا دەکات ،بە بێ ئەوەی بزانێت کە نازانێت،ڕاکردن بە پێی پەتی بە ناو دڕکوداڵ و وردە شوشەدا جۆرێکە لە نەخۆشی یان گەمژەیی،گەلانی دنیا نوکتە دەنوسنەوە،ئەمریکا کتێبێکی هەیە لە توێی 600 لاپەڕەدا جوێنەکانیان تێدا نوسیوەتەوە،کە گەلی ئەمریکا چەند جۆر جوێنی هەیە،،ئاگاداری ساتیرو قسەی خۆش و گاڵتە و گەپ وگۆڵمەز نین،بڕۆن کتێبەکانی ڕشتەی مرواری عەلائەدین سوجادی بخوێننەوە،کەلە ئەخلاقی بەرزدا کەستان دەستان ناگاتە پاژنەی پێی،دنیای نوسین بەرفراوانەو هەمە چەشنە.

من وەختێک هەندێ نوسین وەک ساتیرو قسەی خۆش لەسەر مەلا مستەفا یان هەرکەس دەنووسم،ئازادم،خۆ من وەک ئەوان ئینسانم نەکوشتوە،دزی و جەردەیم نەکردوە،نیشتیمان وگەلم نەفرۆشتوە،بریا مەلا مستەفا هەزاران نوسینی بنوسیایە وەلێ 55 کوڕی کوردی لە حیزبی دیموکرات نەدایە بە ساواک ولە سێدارە نەدرانایە،سڵێمانی موعەینی نەفرۆشتایە.

بریا هەزاران جوێنی بدایەو مێرگەسوریەکانی قەتڵوعام نەکردایە،سەد بریا هەزاران سوکایەتی کردایە بە نوسین ،وەلێ ئاشبەتاڵی نەکردایە،با مەسعود بارزانی لە نوسینێدا نەک ڕەخنە و قسەی گاڵتەجاڕی،سەدان جوێنی بەسەردەشت عوسمان بدایە،بەڵام ناودەمی پڕ نەکردایە لە فیشەک،بریا سەدان ئیهانەی بە سۆرانی مامە حەمە بکردایە بەڵام سنگی بە فیشەک دانەبێژایە،هەزار تفی لە هەموومان بکردایە بە ڵام سیو یەکی ئابی نەکردایە،بریا هەزار بێحورمەتی بە یەزیدیەکان بکردایە بەڵام هەموویانی نەفرۆشتایە بەداعش و سەدان ژن بە تاڵان نەبرانایە،هەزار بریا مەسعود بارزانی هەموو بەیانیانێک دەیان پەت پەتێنی بە هەموومان بکردایە بەڵام لەسەر داوای تورکیا شەڕی پەکەکەی نەکردایەو زیاتر لە 750 گریلای ئەو پارتەی شەهید نەکردایەو سێ هەزارو پێنچ سەد جاشمەرگەی پارتیشی نەدایە بە کوشت، بریاو هەزاران بریا لە شاخ ولە شار سەرانی یەکێتی و پارتی تەنها بە نوسین دژی یەک بونایە،نەک دەیان هەزاریان لەیەک بکوشتایەو سەدان کەسیان زیندەبەچاڵ بکردایە.

بابە لە نووسین مەترسن،لە ڕەخنە مەترسن،لەسەر نوسین و ڕەخنە وەک دوژمن سەیرمان مەکەن،وامەزانن ڕقمان لێتانە،بڕۆن لە خیانەت بترسن،لە دزو جەردەو مافیا بترسن،لەوانە بترسن کە ڕۆژنامەنووس لە ناوماڵەکەی خۆیاندا تیرۆر دەکەن،لە کورد فرۆشان و نیشتیمان فرۆشان بترسن،لەوانە بترسن کە سوار قەڵادۆشکانی کۆمەڵگا بوون و دانابەزن ودەڵێن سەرۆکی هەتا هەتایین، لە دیکتاتۆرو تاڵانچیان بترسن،لەوانە بترسن ئازادی دەخەنە ژێر پێ باوەڕیان بە ڕەخنە ونوسین نییە،لەوانە بترسن کە بە فەسادی خۆیان کۆی کۆمەڵگایان فاسد کرد.

بریا کورد وحیزبەکانی بە درێژایی مێژو،لە جیاتی پەلاماری چەک،لە جیاتی یەکتر کوشتن،لە بری ئەسیری یەکتر کوشتن،لە جیاتی شەڕی ماڵەو ماڵ ویاڵەو یاڵ، بەس دژی یەک بیان نوسیایە،ئەو پەڕی ڕەخنەی توندیان بنوسیایە،نەک ماڵ نەماوە کوڕێکیان نەکوژرابێت،نەک دەریایەک فرمێسکیان بە ژن ودایکو منداڵانی کورد هەڵڕشت..

سەیرە شڕە مەکتەبی سیاسیو فشە سەرکردە دەناسم بە دەستی خۆی ئەسیری کوشتوە،گۆڕی بە ئەسیر هەڵکەندوەو بە زیندویی کردویەتی بەژێر خۆڵەوە،پیاوی کوشتوە تەنها لەبەر ئەوەی پەیوەندی سێکسی لەگەڵ ژنەکەی هەبوە،فشە سەرکردە دەناسم دەیان ملیۆن دۆلاری دزیوە،بستێ خاکی نیشتیمان نەماوە هەڕاجی نەکردبێ،ئەوەتەی هەیە سەرقاڵی چەمانەوەیە، کەچی هەڕەشەی کوشتنمان لێدەکان تەنها لە سەر نووسین، ئەوی پیاو کوژ،ئەسیر کوژ،لچ ولوتو گوێ بڕ،وادەزانێت سوکایەتی پێکراوە وەختێک ئەرشیفی پیسی هەڵدەدەینەوە،سەیرە خۆی تەحەمولی نوسین ناکات وژن و پیاو کوژیشە،ڕەخنە قبوڵ ناکات ودزوجەردەو شەوکوتیشە،دزی دەکات دەڵی مەڵێن دز،درۆ دەکات و هاوار دەکات مەڵی درۆ دەکات، مێژووی زەلکاوەو دەیەوێ کەس باسی نەکات..

تکایە لە نوسین مەترسن،قسەی من لە ڕووە،ئاخر دوو سەرکردەی لێدەرچێت نە کەستان بە پیاو دەزانم نەلەبەرتان هەڵدێم،نەلەبەر ئەوەی خراپەیەکتان بۆ من هەبووبێت،نا،لەبەر ئەوەی خیانەتتان بە نیشتیمان وگەلەکەم کردوە،خوێنی شەهیدان و تەواوی قوربانیەکانتان خواردۆتەوە،کوردتان کوشتوە،تاڵانتان کردوە،ئازادیتان لەژێرپێ ناوە،پاشای درۆزنان وخائینانن،هەی هەموو ئەو مافیاو جەردانەی لە خۆڕا خۆتان پێ سەرکردەیە.

تایبەتمەندییەکان: وتارو بیروڕا

زیادکردنی وەڵام