تەکنولوژی د ڕوژا مە دا د سەرجەم بوارێن ژیانێ دا ڕولێ خو دبینت، هەر کەسەك ب کێماسی ئالاڤەکێ تەکنولوژیێ لگەل هەیە و بوویە پارچەك ژ ژیانا روژانە یا مروڤان د ناڤ جڤاکان دا، دەست ڤە ئینانا ب ساناهی یا ڤان ئالاڤا بێ سنورە و ب هەر ڕێکەکا هەبت کەس ڤان ئالاڤا ب دەست خوە ڤە دئینن بو برێکرنا کارێن خوە یێن ڕوژانە، ئەڤجا ئەڤ ئالاڤە چ تەلەفون بن یان ئالاڤێن مەزنتر وەك لاپتوپ و کومپیوتەر و یێن دی.

کو بارا پتریا وان کارێن وەکهەڤ دکن و ب ساناهی د ئێخن، لگەل وەرارا تەکنولوژیێ و بوارێن وێ ئاریشێن وێ ژی رێکێن جودا جودا ب خوە ڤە دیتینە ژ وانا خراب بکار ئینانا ڤان ئالاڤان وەك بێزارکرنا کەسێن دی تایبەت ب رێکا تورێن جڤاکی و پوستێن ئەلەکترونی، ئەگەرێ ڤێ چەندێ یێ سەرەکی نەبوونا ڕەوشەنبیریا بکار ئینانا تەکنولوژیێ و نەزانینا مفا وەرگرتنێ یە ژ تەکنولوژیێ.

ئەڤ چەندە هەر چەندە ل سەر ئاستێ جیهانێ هەیە بەلێ د ناڤ جڤاکێن پاشکەفتی دا دیاردا بکار ئینانا خراب یا ئالاڤێن تەکنولوژیێ سەڕەڕای هەبوونا یاسایێن تایبەت بو رێگری کرنێ بەردەوام هەیە و گەلەك کەس دبنە قوربانی ڤێ نەزانینێ، نەبوونا تێگەهشتنێ خالەکا گرنگە د ڤی بواری دا وەك د بوارێن دی یێن جڤاکی دا و تێگەهشتن و رێزگرتن خالێن گرنگن بو پێشکەفتنا جڤاکی و پەیوەندیێن جڤاکی ل سەر بنەمایێ رێزگرتن ل کەسێن بەرامبەر دهێتە ئاڤاکرن بەلێ ئەگەر رێزگرتن نەما یان لاواز ژی ببت وی دەمی ئاریشە پەیدا دبن و شەنگستەیێن جڤاکی دهێنە ژناڤبرن، ب پێشکەفتنا تەکنولوژیێ پەیوەندیێن جڤاکی کەفتن د کەتوارەك جوداتر ژ یێن پێشتر و ل جهێ ئاخفتن و دان و ستاندنێن ڕوی ب ڕوی بووینە دان و ستاندنێن ئەلەکترونی ب رێکا بەرنامێن ئینترنێتێ.

ژ لایێ دی ڤە تورێن جڤاکی ب ساناهی کەس دشێن خوە تومار بکن ئەڤە ژی بوویە ئەگەرێ وێ چەندێ گەلەك کەس ل جهێ هژمارەکێ دوو یان پتر هژمارا بکار بینن و رێکێن ساختەکاریێ د زانیاریێن کەس یدا دهێنە کرن و ب رێکێن جودا کەسێن دی بێزار دکن یان گەفا لێ دکن بێی کو ناڤێ خوە یێ درست نیشا کەسێ گەف و بێزار لێ کری دیار بکت، ئەڤە نە بتنێ دبت ئەگەرێ ئاریشێن جڤاکی بەلکی ئاریشێن یاسایی و زیانێن دەروونی پەیدا دکت و گەف لێ کری بەردەوام هەست ب مەترسیێ دکت ژ بەر کو لایەنێ گەفان لێ دکت دیار نینە و دبت ئەگەرێ نە دیار بوونێ و ل دویڤدا نەخوشی و بێزاریێ پەیدا دکت. ئەڤجا یاسا بتنێ بەس نینە بو رێگری کرن ل ڤێ دیاردا نە شارستانی پێتڤی یە ب گەلەك شێوازێن جودا جودا بهێتە هەوڵدان دا کو ئەڤ دیاردا کرێت و دویر ژ شارستانیەتێ و مروڤایەتیێ نەمینت.

تایبەتمەندییەکان: هەمەڕەنگ

زیادکردنی وەڵام