د.محەمەد علی

یەكەم: مەلا علی بوچناك، پیاوێكی تەمەن هەشتا ساڵی موسڵمان و نورانی، خەڵكی ئاگری، كوردستانی باكور، بەتۆمەتی خوێندنی سروت و مەولونامەی ئاینی بەزمانی كوردی لەمزگەوت، زیندانی دەكرێت. نەخۆشدەكەوێت و ڕێگەش نادرێت خێزان و كەسوكاری سەردانی بكەن و چارەسەری پزیشكی وەرگرێت. چوارشەممەی ڕابردو، ٢٠٢٠/٩/٢٣، لەناو زیندان كۆچی دوایی كرد.
بەڵام بەشێك لە ئیسلامیەكانی ئێرە ئەردۆغانیان لێبوە بە فریادڕەسی ئیسلام و موسڵمانان و ڕێكخراوی یەكێتی جیهانی زانایانی موسڵمانی سەید ئەحمەدو علی قەرەداخیش، ئامادەنین بەرگری لە مەلا علی بوچناكی هاو ئاین و هاوزمانیان بكەن. بەڵام دوساڵ لەمەوپێش ڕێكخراوەكەیان ئیدانەی تەقاندنەوەی یانەیەكی شەوانی ئەستەنبوڵی كرد.

دوەم: هەرلەم هەفتەیەدا، دو پیاوی كوردی مەدەنی و بێ چەك (عوسمان سیبان و سەروەت تورگوت) لەشاری وان دەستگیردەكرێن و لە فڕۆكەیەكی سەربازیەوە دەخرێنە خوارەوە، دوای مانەوەی بۆ ماوەیەكی كەم لە نەخۆشخانە، ئەمڕۆ سەروەت مرد.

سێیەم: بە دایكە كوردەكە ڕائەگەیەنن پۆستەت بۆ هاتووە. كە دایكەكە ئەڕوات پۆستەكەی وەربگرێت ئەبینێت لە دەوڵەتەوە هاتووە. ئەبێ چی تێدابێت؟ دەوڵەتی توركیا لاشەی پارچەپارچەبووی كوڕە گەریلاكەی كردووەتە پاكەتەوە و بە پۆستە بۆیانناردووە! ئەو كوڕەی كە نۆ مانگ بە پێستی سك هەڵیگرتووە و بە شیری خۆی گەورەی كردووە و خۆی لە ئاو و ئاگر داوە تاكو گەورەی بكات.

چوارەم: دە ئەندام پەرلەمانی كورد لە زیندانەكانی توركیان. لە ٢٠١٤-٢٠٢٠: ١٦٩ سەرۆك شارەوانی هەڵبژێردراوی كورد لەكارەكانیان لادروان و نیوە زیاتریشیان، لەزیندانن.

پێنجەم: لە ٢٠١٦ەوە، زیاد لە ١٢١ هەزار ئەندام و لایەنگری گروپی موسڵمان و ئاینی سەربە بزوتنەوەكەی فەتحوڵلا گوڵەن لەكارەكانیان دەركراون و ژمارەیەكی زۆریشیان زیندانی كراون. مانگی پێشو ٢٢ كەسیان هەڵهاتن و لەیۆنان داوای مافی پەنابەریانكرد.

شەشەم: ئەردۆغان تەنیاو تەنیا كەسێكی ئۆتۆكراسە (حكومڕانی تاكەكەسی) و لە پێناو ئامانجە سوڵتانیەكانیدا، زۆر نادیموكراتانە پەلامار دەدات و ڕەفتار دەكات. بەئاشكراو نەشیشاردوەتەوە: تەماحی داگیركردنی زۆر شوێنی ناوچەكەی هەیە بە كوردستانی باشوریشەوە.

سەڕەڕای دەیان تاوان و داتاو بەڵگەی تر كەسەلمێنەری تاكڕەوی و دیكتاتۆری ئەردۆغانن، سەیرلەوەدایە پێتوابێ: ئەردۆغان فریادڕەسی ئیسلام و كوردەو ئەوەشی ڕەخنەی لێبگرێت “فیكەی حەرامزادەیە”؟!

تایبەتمەندییەکان: وتارو بیروڕا

زیادکردنی وەڵام