باشاك دەمیرتاش هاوسەری سەڵاحەددین دەمیرتاشی سەرۆكی پێشووی پارتی دیموكراتی گەلان، كە هاوسەرەكەی ماوەی نزیكەی چوار ساڵە لە زینداندایە، رۆبەرتۆ سپانۆی سەرۆكی دادگای مافی مرۆڤی ئەوروپی رووگیر دەكات بۆ ئەوەی سەردانی شاری ئامەد بكات، كە ئێستا بەسەردانێك لە توركیایە، تا لەنزیكەوە و دوور لە گێڕانەوەی فەرمی دەوڵەت ئاگای لە دۆخی ناوچەكە بێت.

باشاك لە تویتێكدا ڕووی دەمی كردووەتە سەرۆكی دادگای مافی مرۆڤی ئەوروپا و دەڵێت: رۆبەرتۆ سپانۆ سەرۆكی دادگای مافی مرۆڤی ئەورپا، چاوتان بە سەرۆكی توركیا و بەپرسە حكومییەكان كەوت، كە هیچ بڕیارێكی دادگاكەی ئێوە جێبەجێناكەن.

هەروەها نووسیویەتی: لەمدواییە زانیومە ئێوە لەگەڵ قەیومی شارەوانی ماردین و سەرۆكی لقی پارتی دادوگەشەپێدانی شارەكە كۆبوویتەوە، ئەو شارەی دراوسێی ئامەدە، بانگهێشتت دەكەم بۆ ئاگاداربوون لە پرسی گیراوە سیاسییەكانی پارتی دیموكراتی گەلان، لەسەروویانەوە سەڵاحەددین دەمیرتاشی هاوسەرم، سەردانی شاری ئامەد بكەن.

هاوسەرەكەی دەمیرتاش رەخنەی لە سپانۆ گرتووە، كە تەنیا گوێی لە تێڕوانینی فەرمی دەوڵەت بۆ دۆخی توركیا گرتووە و لەوبارەیەشەوە نووسیویەتی: ئەوەندە بەسە كاتژمێرێكی خۆت تەرخان بكەی بۆئەوەی گوێ لەمن بگرن ، بۆئەوەش دەمەوێت لە ئامەد میوانداریتان بكەم تا لە راستی دۆخەكە ئاگادارتبكەمەوە.

سەڵاحەددین دەمیرتاش لە مانگی نۆڤەمبەری ساڵی ٢٠١٦ وە دەستگیركراوە، هەرچەندە دادگای مافی مرۆڤی ئەوروپی داوای ئازادكردنی دەمیرتاش كردووە و دەستگیركردنی  بەنایاسایی داناوە، بەڵام توركیا ئامادە نییە بڕیارەكەی دادگا ئەوروپییەكە جێبەجێبكات.

وەرگێڕان: ئاكۆ ئاڵی 

تایبەتمەندییەکان: هەواڵەکان

زیادکردنی وەڵام