لە شارۆچكەی چەمچەماڵ ١٢مین ساڵیادی تیرۆركردنی سۆرانی مامە حەمە لەسەر گڵكۆكەی كرایەوە، جارێكی دیكە ئەوە دووپاتكرایەوە كە كەیسەكە لای ڕۆژنامەنووسان داناخرێت.

لەسەر گڵكۆكەی لە شاروچكەی چەمچەماڵ، بەئامادەبوونی كەسوكار و ڕۆژنامەنووسان ستافی گۆڤاری لڤین، یادی ١٢ ساڵەی تیرۆركردنی سۆرانی مامەحەمە كرایەوە.

لەدەستپێكی یادەكەدا تاجە گوڵینەی هاوڕێ و ستافی گۆڤاری لڤین لەسەر گڵكۆی شەهیدی قەڵەم سۆرانی مامە حەمە دانرا، ئەحمەد میرە، وتی: زۆر كەس ئێمە تۆمەتبار دەكەن بەلادان لەسەر ڕێبازەكەی سۆرانی مامە حەمە، بەڵام ئێمە لێرەوە دووپاتی دەكەینەوە، هەرگیز ڕێبازی سۆران كە دژی نادادپەروەریی بوو بەرنادەین. 

فەرمان محەمەد، برای سۆرانی مامە حەمە لە وتەیەكدا رایگەیاند: ئێمە دوای 12 ساڵ لە تیرۆر كردنی سۆران پەنجەی تۆمەت و تاوان بۆ پارتی رادەكێشین و كەیسەكە دانەخراوە تا ئەو كاتەی بكوژەكان دەستگیر نەكرێن. 

لەبمەراسیمەكەدا لەتیف فاتیح فەرەج، نووسەر و ڕۆژنامەنووس و كەسێكی نزیكی شەهید سۆران  وتی “بكوژانی سۆرانی مامە حەمە لای ئێمە و خەڵكی ئاسایی نادیارە، بەڵام لای كەسانی دەسەڵاتدار ئاشكرا و ڕوونە، ئەوانەی لەدەستەڵاتدان لە ئاستی ئەم كەیسەدا بێ دەنگن، ئەوانیش هاوبەشن لەم تاوانە، چونكە كەیسەكەیان لایە بە وردەكارییەوە بەڵام ئاشكرای ناكەن”.

ئەو ئاماژەی بەوەكرد لەو كاتەی شەهید لە ژیاندا بووە پێیوتووە لە نێوان گۆڤاری لڤین و رۆژنامەیەكی خاوەن پارەدا یەكێكیان هەڵبژێرێت بۆیە سۆران وتویەتی كە ئەو لڤین هەڵدەبژێێت و پارەی زۆرتری ناوێت. 

تایبەتمەندییەکان: وتارو بیروڕا

زیادکردنی وەڵام