رۆژنامەی لۆجۆرناڵ دو دیمانش JDD دی فەرەنسی لە كۆشكی ئەلیزێ چاوپێكەوتنێكی لەگەڵ ئیمانوێل ماكرۆنی سەرۆكی فەرنسا ئەنجامداوە و باسی لەوە كردووە، كە كۆشكەكە وەك بارەگایەكی فەرماندەیی سەربازی لێهاتووە و تێیدا سەرۆكی فەرنسا لەگەڵ تیمێكی بچووك بۆ دۆخی لەناكاو بۆ بەدواداچوونی گۆڕنكارییەكانی پەیوەست بە نەخۆشییەكە بەردەوام سەرقاڵن .

سەرۆكی فەرەنسا لەچاوپێكەوتنەكە رایگەیاندووە، ئەوە جەنگێكی درێژخایەنە و پێویستی بە هاوسۆزی یەكگرتنێكی بەهێز هەیە، هەروەك پێویستی بە توانایەكی گەورەی خۆگونجاندن هەیە.

ماكرۆن لە لێدوانەكەیدا بۆ رۆژنامە فەرەنسییەكە باسی لەڕیزبەندی تەحەددیاتەكانی بەردەمیان كردووە، كە یەكەمیان بریتییە لە رووبەرووبوونەوەی دۆخی لەناكاو و پاراستنی كەسانی بەساڵاچوو بەوپێیەی چینی هەرە لاوازن، دواتر پاراستنی خودی سیستەمی تەندروستی و ئاگاداربوون لەهەموو كۆمەڵگە و ئەو دۆخە شڵەژان و دڵەڕاوكییەی گرتوویەتییەوە و بەهێزكردنی تواناكانی لە رووبەرووبوونەوەی ڤایرۆسەكە وەك یەك نەتەوە.

هەروەك مارۆن هۆشداریداوە لەوەی فەرەنسا رووبەرووی قەیرانێكی دارایی و ئابووری بووەتەوە، كە لە مێژوودا بێپێشینەیە، ئاماژەی بۆ ئەوەش كردووە رووبەرووبوونەوە لەگەڵ ڤایرۆسی كۆرۆنا هێشتا لەسەرەتادایە .

ئەو قسانەی ماكرۆن لەكاتێكدایە، كە مشتومڕێكی زۆر لەبارەی ڕێكارەكانی حكومەت بۆ بەرەنگاربوونەوەی ڤایرۆسەكە لەو وڵاتە لەئارادایە بەجۆرێك قەیرانی دەستكەوتنی دەمامك و پشكنینی تایبەت بە ئاشكراكردنی كەسانی تووشبوو هەیە .

وەرگێڕان: ئاكۆ عەبدوڵڵا ئاڵی

تایبەتمەندییەکان: هەواڵەکان

زیادکردنی وەڵام