سوپای پاسدارانی ئێران رایگەیاند، ئەگەری ئەوە هەیە لە چەند كاتژمێری داهاتودا گروپی چەكدارەكانی عێراق هێرشی بەرفراوان بكەنە سەر بەرژەوەندییەكانی ئەمریكا لە عێراق.

ئاژانسی هەواڵیی زمانحاڵی سوپای پاسدارنی ئێران ئەمشەو چوارشەممە لە زاری سەرچاوەیەكی نێو حەشدی شەعبییەوە رایگەیاند “پێشبینی ئەوەدەكرێت هێزە میلیشیاكانی عێراق (كە ئەو سەرچاوەیە بە هێزە بەرگرییەكانی عێراق) ناویبردوە، لەماوەی چەند كاتژمێری داهاتودا هێرشبكەنە سەر بەرژەوەندییەكانی ویلایەتە یەكگرتوەكانی ئەمریكا لەو ناوچەیە”.
ئەو سەرچاوەیە ئاماژەی بەوەشكردوە “ئامانج لەو هێرشە بەرفراوانەی پێشبینی دەكرێت بكرێتە سەر بەرژەوەندییەكانی ئەمریكا، دەركردنی هێزەكانی ئەو وڵاتەیە لە وڵاتەكە”.

لای خۆیەوە، قەیس خەزعەلی، ئەمینداری گشتی گروپی چەكداریی عەسائیبی ئەهلی حەق ئەمڕۆ چوارشەممە رایگەیاند “پاش وەڵامدانەوەكانی ئێران، لە ئێستادا كاتی ئەوە هاتوە عێراقیش وەڵام بداتەوە”.

هەر لەمیانی وتەكانیدا خەزعەلی وتی “وەڵامدانەوەكانی ئێران لە تۆڵەی قاسم سولەیمانیدا بوە و لە ئێستادا كاتی ئەوەیە عێراق یەكەمین وەڵامی خۆی بداتەوە سەبارەت بە كوشتنی ئەبو مەهدی موهەندیس” وتیشی “عێراقییەكان خاوەن هێز و جەربەزەیین و وەڵامەكەیان كەمتر نابێت لە وەڵامەكەی ئێران”.

تایبەتمەندییەکان: هەواڵەکان

زیادکردنی وەڵام