کۆبونەوەی 5/11 ی هەر سێ سەرۆکایەتیەکەی هەرێم و بەرهەم ساڵح کە چەندین حیزبی کارتۆنی و دوکانی سیاسیش کە تەنها وەسیلەیەکن بۆ گیرفان پڕکردنی کۆمەڵێ ڕوخساری دزێو ناشیرین تێیدا بەشدار بوون، نە مانای هەیە نە بۆ خواستی گەلەکەمان قیمەتی هەیە.

ئەمانە بە قەولی خۆیان کۆبونەتەوەوە بۆ تاوتویکردنی وەزعی سیاسی عێراق لە کاتێکدا سی ساڵە کۆدەبنەوە بۆ چاککردنی وەزعی هەرێم تا ئێستا نەیان توانیوە سانتیمەترێک بچنە پێش، ڕۆژ بەڕۆژ هەرێم پارچە پارچە دەبێت و ژیان وئازادی تێیدا بێمانا دەکرێت.

ئەمانە پشتیوانی خۆیان بۆ چاکسازی لەعێراق رادەگەیەنن، بەڵام خۆیان ناتوانن یەک هەنگاو بۆ چاکسازی بنێن لە دەسەلاتەکانی خۆیاندا، ئاخر کەسانێک نەتوانن چاکسازی لە ماڵی خۆیاندا بکەن، چۆن دەتوانن پشتیوانی چاکسازی بکەن؟ کەواتە ئەمەیشیان تەنها کۆبونەوەی بەردەم کامێرایەو بچوکترین قورسایی نیە.

لە بەشێکدا پشتیوانی لە داواکانی خۆپیشاندەران دەکەن، بەلام لای خۆیان خۆپیشاندەران بێنە سەر شەقام و داوای مافەکانیان بکەن بە گولە وەڵامیان دەدرێتەوە.

لەمانەیش بگوزرەێین، ئێمە لەسایەی”پارتی و یەکێتی” دا هەرێمێکی داروخاو دۆراوین، ئەوەیشی ئەم دۆخەی خولقاند هەر ئەوان بوون، من بەوپەری وجودمەوە دەڵێم بوونی شتێک بە ناوی هەرێم هەرلە سەرەتاوە فێڵێک بوو لە کورد کرا، تا بڵێن کوردستان تەنها هەرێمێکەو هەرێمەکەیش سلێمانی وهەولێرو دهۆکە، لێرەوە بوو کەرکوکیان بردو نیوەی خاکی کوردستانیان ناولێنا “ناوچە ناکۆکی لەسەرەکان”.

ئەمان”پارتی و یەکێتی”داوای هەلبژاردن ودەنگدانیان دەکرد، تا بیسەلمێنن ئایە کەرکوک بەڕاستی کوردستانیە یان نا، ئاخر میلەت هەیە لەم دنیایەدا لەسەر خاکی خۆی داوای دەنگدان بکات و قوماری ئاوا بە شارو خاکی خۆیەوە بکات؟میلەت هەیە بە داگیرکەری شارەکەی، وڵاتەکەی، ناوچەکەی بڵێت، وەرن با هەڵبژاردن بکەین بزانین ئەم وڵاتە،ئەم شارە ئەم ناوچەیە هی کاممانە؟

یەکێتی وپارتی دوای سی ساڵ، ئامادەن تا سەد ساڵیترو بۆ کوڕاو کوڕیان ئاوا دابنیشن بخۆن وبدزن و بکوژن، تەنها ئەو سێ شارەیان بدەنێ و لێیان گەڕێن بەم حاڵەی ئێستاوە بونیان هەبێت، بەسیانە، چونکە سامانی ئەو وڵاتە بەتالان دەبەن و هێندە پارەیان کۆکردۆتەوە نازانن لە کوێ و لە کام بانکی جیهانیدا کەڵەکەی بکەن، ئەوان خۆیان ژیانی شاهانەیان هەیە، ئەوان دەبێت خەمیان بێت ئەو هەرێمە نەمێنیت نەک ئێمە.

خۆ ناکرێت ئەم هەرێمە هێلکە ئاڵتونەیەکی بۆئەوان بێتوڕیقنەکەیشی بۆ ئێمە، ئێستا یان هەرکاتێک هەرێم بەرەو لاوازی و نەمان بچێت ، ئێمە بچین هاوخەم وهاوسەنگەریان بین،بە ناوی کوردستان و کوردایەتی و کۆمەڵێ قسەی قۆرەوە.

ئەو شتەی سی ساڵە ناویان ناوە هەرێم وکۆمەڵێ چەتەوخائین دەستی بەسەردا گرتوە، ئەوە باشور نیە،هەرێم نیە، بەڵکو سێ شارەو دراو بە پارتی و یەکێتی و ئەوانیش سی دانە ساڵە دەکوژون دەدزن.

لەدەستوری عێراقیشدا هەر ئەو سێ شارەیە، سی ساڵیشە کورد بچوکترین دەسکەوتی نەبووە، پڕکردنی گیرفانی بنەمالەی بارزانی و تاڵەبانی و کۆمەڵێ شڕە سەرکردایەتی ئەم حیزبانە نەبێت، کەواتە دەستوری بەغدا بگۆڕێت یان نەگۆڕێت بۆ خەڵک چییە؟ ئەگەر ئەو دەستورە تا ئێستا بە قازانجی کورد بووە، بۆچی لەو ڕۆژەوە نوسراوەتەوە یەک قازانجی بۆ کورد نەبووە؟ ئەوانەی لایلایە دەنوسنەوەو شانازی بە نوسینەوەی دەستورەوە دەکەن و گوایە زۆرخاڵی گەشی تیدایە بۆکورد، با زەحمەتبکێشن و سی ساڵە کەمترین خێری ئەو دەستورەمان پێبڵێن؟

هەرچی وڵات و حیزب هەیە دەستورەکەی، بەرنامەکەی لەسەر کاغەز زۆرجوان و مرۆڤانەیە، ئەوەی کۆمەڵگا هەڵدەلوشێت کردەوەی سیاسیەکانە،هی دەسەڵاتدارەکانە نەک دەستور یان بەرنامەو پڕۆگرامی دەوڵەت و حیزب.

بوونی دەستوری عێرق بۆ کورد سفر بووە، دەسەڵاتی پارتی و یەکێتی سفر بووە، ئەگەر ئەم دەستورە نەمێنیت و دەستورێکی تر بنووسنەوە ئەوپەڕی کورد بێتە خوار سفرەوە، بە هەموو ئەقڵێکیش جیاوازیەکی ئەوەندە لە بەینی سفرو ژێر سفردا نیە.

ئێستا هەرێم و پارتی و یەکێتی بۆ گەلەکەمان سفرن، دەی با ئەم سفرە نەمێنیت، بەرای من نەمانی پارتی و یەکێتی گەورەترین دەسکەوتە بۆ گەلەکەمان،لانی کەم ئەوکاتە دەتوانین لە سفرەوە دەست پێبکەینەوە دژی داگیرکەرانی کوردستان.

تایبەتمەندییەکان: بابەتی هەڵبژاردە

زیادکردنی وەڵام