ساڵح ژاژڵەیی، جێگری پێشوی جڤاتی گشتی گۆڕان كە ئەمڕۆ لەگەڵ شەش ئەندامی دیكە نامەی دەستلەكاركێشانەوەیان پێشكەشی رێكخەری بزوتنەوەی گۆڕان كرد هۆكاری دەستلەكاركێشانەوە بە كۆمەڵیان ئاشكرادەكات و دەڵێت هیچ بەهایەكیان بۆ پێشنیاری جڤاتی گشتی گۆڕان سەبارەت بە هەڵبژاردنەوەی جڤاتی نیشتیمانی و خانەی راپەڕاندن دانەنا، دەشڵێت، رێكخەری گشتی ئێستا خۆی كاندید دەكاتەوە.
ئێمە 7 كەسین، ئەمڕۆ نامەمان ناردوە بۆ رێكخەری گشتی و خانەی راپەڕاندن، ئاگادارمانكردون كە دەستمان لە ئەندامێتی جڤاتی گشتی و ئەندامێتی بزوتنەوەی گۆڕان كێشاوەتەوە

 

ساڵح ژاژڵەیی، یەكێك لەو ئەندامانەی دەستیان لەكاركێشاوەتەوە لە بزوتنەوەكە بە خەندان-ی راگەیاند،”ئێمە 7 كەسین، ئەمڕۆ نامەمان ناردوە بۆ رێكخەری گشتی و خانەی راپەڕاندن، ئاگادارمانكردون كە دەستمان لە ئەندامێتی جڤاتی گشتی و ئەندامێتی بزوتنەوەی گۆڕان كێشاوەتەوە و هیچ پەیوەندیەكمان پێوە نەماوە و رازی بن یان نا ئێمە ناگەڕێینەوە ناو بزوتنەوەكە”.

ئەو ئەندامانەی دەستیانلەكاركێشاوەتەوە پێكهاتون لە (ساڵح ژاژڵەیی، جێگری سەرۆكی جڤاتی گشتی، پرۆفیسۆر د.عەلی تالیب، د.شەریف قادر، د.سابیر ئیسماعیل، حەیدەر حەسەن شوان، ئاوات بەهادین محەمەد، عادل كاكەیی).

سەبارەت بەهۆكاری دەستلەكاركێشانەوە و وازهێنانیان لە گۆڕان ساڵح ژاژڵەیی رایگەیاند،”هۆكارەكان زۆرن، بەڵام هۆكاری سەرەكی ئەوەیە كە جڤاتی نیشتیمانی بڕیاریداوە 14ی مانگ خانەی ڕاپەڕاندن بۆ دو ساڵی دیكە هەڵبژێرێتەوە، لەكاتێكدا جڤاتی نیشتیمانی خۆی وادەی یاسایی تەواو بوە و لە بۆشایی یاساییدایەو ئەو دەسەڵاتەی نییە خانەی راپەڕاندن هەڵبوەشێنێتەوە”.

بڕیارەكەیان خستە بواری جێبەجێكردنەوە و لە 12ی مانگ جڤاتی گشتی دەستەی سەرۆكایەتییەكەی هەڵدەبژێرن كە كەسی یەكەمی دەبێتە ئەندامی خانەی راپەڕاندن

 

وتیشی،”ئێمە پێشنیارمانكرد كە خانەی راپەڕاندن ماوەیان بۆ درێژبكرێتەوە بۆ كۆتایی ئەمساڵ تا كاتی كۆنفرانس، ئەوكات جڤاتێكی تازە بە رۆحێكی نوێوە هەڵببژێردرێت، ئەو كاتە ئەو جڤاتی نیشتیمانی خانەی ڕاپەڕندن هەڵبژێرێت، بەڵام هیچ بەهایەكیان بۆ پێشنیارەكەی ئێمە دانەنا، بڕیارەكەیان خستە بواری جێبەجێكردنەوە و لە 12ی مانگ جڤاتی گشتی دەستەی سەرۆكایەتییەكەی هەڵدەبژێرن كە كەسی یەكەمی دەبێتە ئەندامی خانەی راپەڕاندن، لە رۆژی 14ی مانگیش شەش ئەندامەكەی دیكە جڤاتی نیشتیمانی هەڵیاندەبژێرێت، بەبێ ئەوەی هیچ بەهایەك بۆ پێشنیاری جڤاتی گشتی بكەن، بۆیە ئێمەش پێكەوە بڕیارمانداو دەستمانلەكاركێشایەوە”.

سەبارەت بە هەڵبژاردنی ئەندامانی خانەی راپەڕاندن و ئەو كەسانەی دەیانەوێت خۆیان بەربژێر بكەن بۆ رێكخەری گشتی رایگەیاند،”بەدڵنیاییەوە كاك عومەری سەید عەلی خۆی كاندید دەكاتەوە بۆ رێكخەری گشتی، بەڵام خەڵكی نوێ خۆیان كاندید دەكەن بۆ خانەی راپەڕاندن، چونكە ئەندامەكانی ئێستا بەشێكیان نەماون وەكو عوسمانی حاجی مەحمود زو وازی هێناوە و هەریەك لە  د.رەئوف عوسمان و مامۆستا جەمال و محەمەد تۆفیق رەحیم خۆیان كاندید ناكەنەوە، ئەمە جگە لەوەی ئەگەر كاك جەلال جەوهەر ببێتە بریكاری سەرۆكی حكومەت ئەو كاتە ئەویش بەپێی پەیڕەوی ناوخۆ ناتوانێت ببێتە ئەندامی خانەی راپەڕاندن”

بەهۆی ئەو بارودۆخەی ئێستا بزوتنەوەكەی تێكەوتوە، پێموایە گۆڕان بە بارودۆخێكی خراپدایە، چونكە هەمو سەرمایەیەكی رەمزی حزبێكی سیاسی متمانەی جەماوەرە

 

دەربارەی ئایندەی بزوتنەوەی گۆڕان رایگەیاند،”بەهۆی ئەو بارودۆخەی ئێستا بزوتنەوەكەی تێكەوتوە، پێموایە گۆڕان بە بارودۆخێكی خراپدایە، چونكە هەمو سەرمایەیەكی رەمزی حزبێكی سیاسی متمانەی جەماوەرە، بەڕاستی بزوتنەوەی گۆڕان متمانەی جەماوەری لەدەستداوە و لەناوخۆشدا وردە وردە خەڵك بێزار دەبێت، لەبەر ئەوەی هەست دەكەین بزتنەوەی گۆڕان ئەو مەبەستەی لە پێناویدا دروستبو لەو رێرەوە لایداوە، بۆیە ئایندەی بە باشی نابینم”.

ساڵح ژاژڵەیی لەبارەی ئایندەی كاری سیاسییانەوە رایگەیاند،”ئێمە پێكەوە وازمانهێناوە، بەڵام هیچ بەرنامەیەكمان دانەناوە بۆ داهاتوی كاری سیاسیمان، هەر كەسێكمان ئازادە لەوەی چی بڕیارێك دەدات.

تایبەتمەندییەکان: هەواڵەکان

زیادکردنی وەڵام