لە سەرمایەدارییەوە تا بورژوازی بچوک، تا چینی کرێکار کە قەرارە ببنە دیکتاتۆریەتی پرۆلیتاریا بۆسەرکوتی بورژوازی، ئەوەیشی کە پێی ئەلێن سیستەمی ئەوروپای دیموکراسی، هەمیشە لەم کلاوڕۆژنەیەوە”دیموکراسی” لە ئازادی دواون، کە دواجار ئازادیەکی درۆینەیە، قسەکردن و بانگەشە بۆ دیموکراسی هیچ نیە لە دەمامکێک زیاتر بۆ کوشتنی خودی ئازادی، ئەگەر وانەبوایە ئەوروپا کە خۆی بە لوتکەی دیموکراسی و مافی مرۆڤ ئەزانێت، باسی خودی”ئازادی” ئەکرد.

مرۆڤی ئاگا زۆر زو لەوە تێئەگات، ئەوەی لە دنیادا هەیە و گرێی خواردوە بە مرۆڤ وسیستەمی حوکمرانییەوە بەرژەوەندیە، ئێستا ئیتر بەرژەوەندی کۆمەڵێ بازرگانی چاکەت وپانتٶڵ لەبەرە لە ئاستی دنیادا، ئەوانە کۆی کایە سیاسی و ئابوریەکان بەڕێوە ئەبەن و بڕیارەکان لای ئەوانە، ئایدۆلۆژیاکان، چەمکە ئازادیخوازیەکان،مافی مرۆڤ و دادگاو دادوەرو مافی ژن ومنداڵ و هەتا گیان لەبەرانیش، تەنها ئەونە بڕ ئەکات کە بەقازانجی ئەم تیمە بێت، هەرکاتێک یەک تۆز هەڵگەڕانەوە ڕووی دا وردو خاش ئەکرێن.

لە بابەتی پێشومدا باسەکە پشتیوانی مەلا کرێکار نەبوو، ئەوێکی ئیسلامی ومنێکی عەلمانی سەد وهەشتا دەرەجە جیاوازیمان هەیە، من باسی تەشقەڵەو قسەی قۆڕی دیموکراسیم کرد، باسی دادگایەکی کوێرو کەڕم کرد، کە ئەم دادگایە بونی بۆ بەشەریەت کارەساتە، ناکرێ لەبەر ئەوەی دژی مەلا کرێکارو ئیسلامی سیاسیم، ئیتر لەبەیک بڵێم بە دادگایەک کە دادی تێدا نیە، لە جێی مەلاکرێکار،مارکس ولینین،سەرۆک وەزیرانی فەرەنساو هۆڵەندیش بوایە، هەمان هەڵوێستم ئەبوو، کەواتە من باسی دادگایەکم کردوە کە دادی تێدانیەو لەپشتیەوە سیاسەت و قازانج ڕاوەستاوە، من باسی سپڵەیی و بێ ئەمەکی خەلکم کرد کە خۆیان وتەنی” بۆ بۆرە پیاو خۆت بدە بەکوشت ئەلێن بەدەردی خوا مرد”.

قسەی من ئەوەیە، مەلا کرێکارێک کە باسی کوشتنی نوێژنەکەری کردوە، پشتیوانی لە داعش و دەولەتی خەلافە کردوە، بە بالای ئەردۆگانی خوێن خۆردا هەڵیداوە،ئەبێ دادگاکەی عادلانە بێت، مەسعود بارزانی هەشت هەزار زێڕەڤانی کێشایەوەو ناوچەی شەنگاڵی دا بە خودی داعش ودەرگای بۆ کردنەوە بەرەو کوبانێ، کە گەورەترین وزامدارترین تراژیدیایی مێژویی خولقاند، ئەویش ئەبێت دادگای بکرێت و دادگاکەی عادلانە بێت،ئەم ئەوروپایە پڕە لەداعشی ئاشکرا،بە ئالا ڕەشەکەوە ئەهاتنە سەرشەقام و نارەزایەتیان دەرئەبڕی، سەرلەبەریان بۆ ئەم ولاتانە کەشفن.

لینین لە دوای شۆڕشی ئۆکتۆبەر دە هەزار کرێکاری دەریاوانی کوشت، کە داوای مافەکانی خۆیان ئەکرد وەک هەقدەست و نان، بەڵام ئەمان ئەیان وت”حکومەتەکەمان ساوایە”، ئەم مەقۆلەیە دوای راپەرین پارتی و یەکێتی دوبارەیان کردەوە.

ستالین و کۆمۆنیزمەکەی تا گۆرباشۆف، کۆمۆنیزمی ئەوروپای شەرقی “نیکۆلای چاوسیسکۆ”کان، چیان بە بەشەریەت نەکرد؟، نزیکەی 25 ملیۆن مرۆڤیان کوشت، ئەزانم ئێوە ئەلین ئەوانە کۆمۆنیست نەبوون بەلکو”سەرمایەداری دەوڵەتی ژێر ناوی کۆمۆنیست بوون” ئیسلامیەکانیش هەروا ئەلێن،”ئێران ئیسلامی نیە، ئەفغان وقاعیدەو ئەنسار، ئیسلامیەکانی پاکستان و جەزائیر تا سوریاولیبیا ئیسلامی نین”،بەڵام راستی ئەوەیە هەم ئەمان ئیسلامی بوون هەم ئەوانیش کۆمۆنیست بوون، ئایدۆلۆژیا لە هەناوی خۆیدا فاشیزم و بەربەریەت بەرهەم ئەهێنێت.

کاتێک”ئاپۆ”لە بیقاع وەدەرنرا، گەلەکۆمەکێیکی نێودەولەتی بوو، پای خاچێك لە چین و ڕوسیا، یەکێ لە ئەمریکاو ئیسرائیل، ئەویان لە یۆنان و ئەوروپا، خۆ ئاپۆ ئیسلامی نەبوو، توندڕەو تیرۆریست نەبوو، خودی ئازادی بوو، بەڵام بەرژەوەندیە سیاسی و ئابوریەکانی ئەوروپا وئەمریکا لەگەڵ تورکیا، ئاپۆی لە ئیمراڵی توند کرد، تاوانی ئەم پیاو تەنها ئەوەبوو، کە سەربە نەتەوەیەکی خاک دابەشکراو، چەوساوە بو بە ناوی کوردوئەیویست گەلەکەی بە مافەکانی خۆی بگات.

لە ناوجەرگەی ئەوروپادا لە”ڤیەن”، دکتۆر قاسملۆو هاوڕێکانی تیرۆرکران، نە دەوڵەتی نەمسا چرکەی لێوە هات نە ئەوروپای فشە دیموکراسی، بکوژەکانی بەو پەڕی ڕێزەوە لەڕێگای فرۆکەخانەوە نێرانەوە تاران…

خۆ سادقی شەرەفکەندیش لە چێشتخانەیەکدا و لە بەرلین تیرۆرکرا، ئەلمانی دیموکراسی و ئەوروپا هیچیان نەوت.

ئەویاسایەی مەلا کرێکاری حوکمدا هەر ئەو یاسای دیموکراسیەیە کە بیست سالە ئاپۆی لە ئیمرالی داناوە، بەڵام هەردوکیان لەژێر ناوی جیا جیادا.

هەر ئەو دیموکراسیەیە کە قاسملۆو شەرەفکەندی و هاوڕێکانیان لەژێر سێبەرەکەیدا تیرۆرکران و چرکەیان لێوە نەهات.

ئەوە چ جۆرە دیموکراسیەکە وەک لاستیک بە ئارەزوی خۆیان ئەیکێشن؟ کرێکار زیندان ئەکات کە”ئیسلامیە، تیرۆریستە”،”ئاپۆ” لە ئیمرالی توند ئەکات، لەبەر کورد بوون وئەیکاتە قوربانی قازانجەکانی لەگەڵ تورکیادا، قاسملۆو شەرەفکەندی عەلمانیش تیرۆر ئەکرێن و دیزە بەدەرخۆنەیشی ئەکەن، کەواتە دیموکراسی مایە پوچە.

تا ئەو ڕۆژەی مرۆڤ و دەسەلاتداران نەگەنە ئەو باوەرەی کە پێویستە مرۆڤەکان بە هەمودەنگ و ڕەنگ و ئایدۆلۆژیایەکەوە، بە هەمو جیاوازیەکانەوە یەکتر قبول بکەن و بەیەکەوە بژین و ژیان جوانتر کەن، بۆ بەلاداخستنی کێشەکان دەست بۆ چەک وتیرۆرو زیندان نەبەن و هەمیشە حیوار بونی هەبێت، ئەم بەربەریەتە هەروا بەردەوام ئەبێت.

فاشیزمی ئایدۆلۆژیایی چ دینی بێت یان بێدینی جگە لە تاوان و ناشیرینکردنی ژیان هیچ ناچننەوە.

ژیان ئەخلاقە،وەک چۆن ئەوەی تیرۆر ئەکات ئەخلاقی نیە، ئەوەیشی تەمەنای سەربڕین و کوشتنی نەیارە سیاسی و فکریەکەی ئەکات هەر بێ ئەخلاقە،هەردوکیان دو ئەقڵن لە فۆڕمێکدا،وەلێ بە دو دیوی جیادا.

 

تایبەتمەندییەکان: بابەتی هەڵبژاردە

زیادکردنی وەڵام