سەرۆك كۆماری ئێران، بە مەبەستی بەكارهێنانی دەسەڵاتەكانی دژ بە فشارەكانی ئەمریكا بۆ سەر وڵاتەكەی، داوادەكات دەسەڵاتی جێبەجێكاری بەرفراوانی پێبدرێت، كە بە “دەسەڵاتی كاتیی جەنگ” ناویدەبات.

ئاژانسی هەواڵی ئیرنا-ی ئێران لە راپۆرتێكیدا رایگەیاندوە، حەسەن رۆحانی، سەرۆك كۆماری ئێران، لەمیانی لێدوانێكیدا ئاماژەی بە جەنگی عێراق-ئێران كردوە، كە تیایدا “ئەنجومەنی باڵای كاتیی جەنگ” توانیویەتی دەسەڵاتەكانی دیكە تێبپەڕێنیت و لەبارەی ئابوری و جەنگەوە بڕیاربدات.

لە راپۆرتەكەدا هیچ دەسەڵاتێكی نوێی دیارینەكردوە، بەڵام لە زاری رۆحانیەوە رایگەیاندوە، “ئەمڕۆ وڵات پێویستی بەو دەسەڵاتانە هەیە كە ئەنجومەنی باڵای كاتیی جەنگ لەكاتی جەنگی عێراقدا هەیبوە و توانیویەتی یەكلاكەرەوە لەبارەی ئابوری و جەنگەوە بڕیاربدات”.

لەمیانی وتەكانیدا رۆحانی ئاماژەی بەوەشكردوە، “ئێران لە بواری بودجە و فرۆشتنی نەوتدا، روبەڕوی كێشەی بەرچاو بوەتەوە كە پێشتر هەرگیز كێشەی لەو جۆرەی بەخۆوە نەبینیوە”.

راشیگەیاندوە، پێویستە وڵاتەكەی یەكگرتو بێت ئەوەش لە پێناو روبەڕوبونەوەی ویلایەتە یەكگرتوەكانی ئەمریکا کە تا دێت فشاری زیاتر دەکاتە سەر تاران.

كێشەكانی نێوان ئێران و ویلایەتە یەكگرتوەكانی ئەمریكا لەمدواییانەدا گەیشتوەتە ئاستێكی بەرز، دوای ئەوەی دو هەفتە لەمەوبەر ویلایەتە یەكگرتوەكان، بە مەبەستی “هۆشداریدان بە ئێران”، كەشتی فڕۆكە هەڵگری ئەبراهام لینكۆڵن و چەند فڕۆكەیەكی جۆری B-52ی رەوانەی رۆژهەڵاتی ناوەراست كرد گرژیەكانی نێوان هەردو وڵات بە بەردەوامی روی لە زیادبونە.

تایبەتمەندییەکان: هەواڵەکان

زیادکردنی وەڵام