لەو شوێنەی خوێنی تۆ ڕژا
لەو خاکەی
تیا گەوزایت
گوڵاڵە سوورە ، ڕوا
هەر زوو لێکرایەوە
بۆ جوانی
بۆ بۆن خۆشی شەوانی سوور
بە  یەخەی یارا کرا
چەپڵەی زۆر بیسترا
بە فرمێسکی تیمساحاوییەوە
لەسەر تۆ زۆر ووترا
چەپڵە بۆ تۆ
گوڵاڵەکەش بۆ ئەوان
بۆ ئەو شەوانەی
بە ڕەنگی خوێنی تۆ
تا شەبەق بەزمە
بەزمی شەوانەی ئەوان
   و
هەرگیز لە یاد نەبوونی تۆ
لەو شوێنەی
خوێنی تۆ ڕژا
زیاتر لەو خوێنە
فرمێسکی دایکت ڕژا
فرمێسکیان هێنا
كردیانە پۆستەر
كردیانە کتێب
كردیانە لیست
دوا جار کردیانە دراو
قاسەکانیان پێ پڕکرا
تا ئەو لێوارەی لێی ڕژا
بژی شەهید….!!
نەمرە شەهید…!!
بونە دروشم
   و
هەر جارەی لە بۆنەیەکا
مێشکمان کاس ئەکا
بۆ نەهێشتنی سەهۆڵبەنگانی
….ژیان
خوێنت ڕژا
ئەمڕۆ بۆتە کورەی گەرما
بۆ جێ خەوی
ئەوان
پەڵە هەوری بەهاریش
لە ئاست خوێنی تۆ
گریا….و گریا
ویژدانیش
وەک دایکە جل رەشەکەی تۆ
واقورماوو..مات
ئینسان بۆ ئەبێ بکوژرێ
…..بۆ
پێش ئەوەی بشکوێ
گوڵ  بۆ هەڵوەرێ
….بۆ
ئەمڕۆ ئەوان
بەناوی تۆ
  و
هەزارانی تریش
بە وێنەی تۆ
   و
سەدان هاوڕێی تریش’
دەنگیان بەرز…
قوڕگی پڕ لە شۆڕشگێڕی
   و
شتی تریش
مایک بەر ناکەوێ
بژی شەهید..سەربەرزە شەهید
دوای چەپڵە و سروودیش
كێ لەبیرێتی
كەی کوژرای تۆ..!!!
بەس دایکت ئەزانێ
یەکەم بڵێسەی سووتانی جەرگی
ئەو ساتە وەختە بوو
كە خوێنت تێکەڵ
بە خاک بوو
بوو بە ئارامگای تۆ
دوێنێ سوێند بوو
ئەمڕۆ دروشمە خوێنی تۆ
ژیانیش
بۆ ئەوان هەر دروشمە
تۆش بووی بە ڕەگ
بۆ خاک
وەک ئەو گوڵاڵەیەی لێی ڕوا
تۆ شەهید
و
ئەوان ، ئەوان و شتی تریش
“”””””””””””’

MAY/2019

تایبەتمەندییەکان: هۆنراوە

زیادکردنی وەڵام