تەقەكەرەكەی نیوزلەندا كە بەرەگەز ئوستورالییە و بەتۆمەتباری سەرەكی كۆمەڵكوژییەكەی دو مزگەوتی ئەو وڵاتە ناسراوە پێشتر راهێنەری هۆڵی لەشجوانی بوە و بەردەوامیش سەردانی وڵاتانی دیكەی كردوە.

بەپێی راپۆرتێكی (سی ئێن ئێن)، برێنتۆن تارانتی تەمەن 28 ساڵ كە بەرەگەز ئوستورالییە  بەتۆمەتی كوشتنی 49 كەس و برینداركردنی دەیانی دیكە راپێچی دادگاكراوە.


لەبارەی پیشە و كەسایەتی ئەو تۆماتبارەوە لەراپۆرتەكەدا هاتوە، تارانت پێشتر راهێنەری هۆڵی لەشجوانی بوە و بەردەوامیش گەشتی كردوە، سەردانی وڵاتانی توركیا و پاكستان و بولگاریای كردوە تیایاندا ماوەتەوە.

ماوەیەكی كەم بەرلە دەستپێكردنی كۆمەڵكوژییەكەی، دۆكیومنتێكی 87 لاپەڕەیی لەتۆڕە كۆمەڵایەتییەكان و لەژێر ناوی تۆمەتبارەكەی نیوزلەندا (برێنتۆن تارانت) بڵاوكرایەوە، بەڵام دواتر دۆكیونتەكە پڕكرا لە كۆمێنتی رەخنەئامێز و گاڵتەجاڕی و دژە كولتوری و لەهەمولایەكەوە هێرشی كرایە سەر.


بەپێی زانیارییەكانی پۆلیس تارانت پێشتر لە ئوستورالیا و نیوزلەنداش هیچ گرفتێكی لەگەڵ هاوڕێ و كەسانی دەروبەری نەبوە و مرۆڤێكی ئاسایی بوە، ئەوەش وایكردوە نەبێتە جێگای سەرنجی دەزگا هەواڵگرییەكان و گومانی هیچ كردەوەیەكی توندوتیژی لێنەكراوە.

پێشتر تارانت راهێنەری هۆڵی لەشجوانی (بیگ ریڤەر) بوە لەناوچەی باكوری گرافتۆن.

لەمبارەیەوە ترێسی گرەی بەڕێوەبەری ئەو هۆڵی لەشجوانیەی كە تارانت بۆماوەی چەندین ساڵ ئیشی تیاكردوە سەرسوڕمانی خۆی بەو روداوە دەربڕیوە و رایگەیاندوە هیچ كارێكی لەوجۆرە چاوەڕوانكراو نەبوە لەتارانت.


باوكی برێنتۆن تارانت كەناوی رۆدنی تارانت بوە لەساڵی 2010 لەتەمەنی 49 ساڵیداو بەهۆی نەخۆشی شێرپەنجە كۆچی دوایی كردوە. بەپێی زانیارییەكانی دەیلی ئێگزامینەر لەشاری گرافتۆنی ئوستورالیا باوكی تۆمەتباری تەقەكردنەكە بە پیاوێكی خزمەتكاری ماڵومنداڵ بەناوبانگ بوە و وەرزشەوانێكی ركابەری پێشكەوتوبوە.

بەپێی زانیارییەكانی پۆلیس لەئێستادا خێزانەكەی هاوكاری لێكۆڵینەوەكانن كەشوێنی نیشتەجێبونیان 400 میل لەبەشی باكوری سدنییەوە دورە

 


بەپێی زانیارییەكانی پۆلیس تەقەكەرەكە پێنج چەكی بەكارهێناوە كە دوانیان چەكی ئۆتۆماتیكی بون و دوانیشیان چەكی ئاسایی بون كە بەڕێگەی یاسایی دەستدەخرێت.

سەرۆك وەزیرانی نیوزلەندا رایگەیاندوە تەقەكەرەكە هەڵگری مۆڵەتی ( كاتەگۆری ئەی) بوە كە رێگەپێدراوە بەچەكی جۆری ئاسایی و مۆڵەتەكەشی لەمانگی نۆڤەمبەری 2017 وەرگرتوە.

بەوهۆیەشەوە، جاسیندا ئاندرینی سەرۆك وەزیرانی نیوزلەندا بەڵێنی داوە هەمواری یاسای پێدانی مۆڵەتی چەك لەوڵاتەكەیان بكەنەوە.

تایبەتمەندییەکان: هەواڵەکان

زیادکردنی وەڵام