یاننیس بێهراكیس، براوەی خەڵاتی پوڵتزەر و فۆتۆگرافەری ئاژانسی هەواڵی رۆیتەرز کە وێنەی کۆڕەوەکەی ساڵی 1991ی باشوری کوردستانی گرت، لە تەمەنی 58 ساڵیدا كۆچی دواییكرد.

بەپێی ئاژانسی رۆیتەرز، بێهراكیس، دوێنێ یەكشەممە بە نەخۆشی شێرپەنجە كۆچی دواییكردوە، ئەو خاوەنی پڕماناترین وێنەكانی كارەسات و روداوە جیهانییەكان بوە و لە رێگەی فۆتۆكانییەوە پەیامی زۆری بە جیهان گەیاندوە.

یاننیس بێهراكیس یەكێكە لەو فۆتۆگرافەرە بەناوبانگانەی وێنەی كۆڕەوەكەی گەلی كورد لە ساڵی 1991دا لە باشوری كوردستانەوە بەرەو سنورەكانی توركیا چركاندوە، وێنەكانی بونەتە بەشێك لە مێژووی كورد كە مەینەتی ئەوكاتەی گەلی كورد دەگێڕنەوە.

دیمەنێک لە کۆڕەوەکەی ساڵی 1991ی باشوری کوردستان

بە درێژایی دەیان ساڵ توانیویەتی چیرۆكی ئاڵنگاری و ململانێكانی ڕۆژهەڵاتی ناوەڕاست و ئەفریقا و ئاسیا و ئەوروپا لەڕێگەی وێنەكانییەوە بگێڕێتەوە و لە ساڵی 2016دا لە گواستنەوەی وێنەی قەیرانەكانی پەنابەراندا تیمەكەی توانی خەڵاتی پرێستیجەس وەربگرێت.

کۆچبەران داوا لە پۆلیس دەکەن رێگەیان پێبدرێت لە ئەسیناوە بچنە مەقدۆنیا 

ئەو فۆتۆگرافەرە وێنەی رووداو و کارەساتەکانی هەریەکە لە (جەنگی ئەفغانستان، کۆڕەوی کورد لە ساڵی 1991 ئاوارەبونی هەزاران هاوڵاتی کۆسۆڤۆ لە ساڵی 1988 جەنگی چیچان، بومەلەرزەی کشمیر، بەهاری عەرەبی، دۆخی کۆچبەرانی جیهان) گرتووە.

شەڕی نێوان گروپە چەکدارەکان لە بەنغازی لە لیبیا

بێهراكیس، لە دایكبوی ساڵی 1960ی شاری ئەسینایە، ناسراوە بە وێنەگری كارەساتە سروشتییەكان و ململانێكان لە جیهاندا، بۆ ماوەی 30 ساڵ لەو كارەی بەردەوامبوە تا سەرەنجام بەهۆی نەخۆشی شێرپەنجەوە گیانیلەدەستدا.

تایبەتمەندییەکان: هەواڵەکان

زیادکردنی وەڵام