یه‌كێتیی پارێزه‌رانی ئه‌وروپا بۆ مافی مرۆڤ له‌ جیهان رایگه‌یاند، گۆشه‌گیریی سه‌ر عەبدوڵا ئۆجەلان و زیندانییانی دیكه‌ به‌ واتای ئه‌شكه‌نجه‌ دێت، دەشڵێت، “ده‌بێت كۆنسه‌ی ئه‌وروپا هه‌نگاوی كرداری بنێت بۆ كۆتایی هێنان به‌ گۆشه‌گیری”.

یه‌كێتیی پارێزه‌رانی ئه‌وروپا بۆ مافی مرۆڤ و دیموكراتی له‌ جیهان (ELDH) رایگه‌یاند، گۆشه‌گیركردنی عه‌بدوڵا ئۆجەلان و زیندانییانی سیاسی پێشێلكردنی یاسا نێودەوڵەتیەکانە.

یه‌كێتییه‌كه‌ لە راپۆرتێکدا ئاماژەی بەوەشکردوە، “ئه‌و گۆشه‌گیرییه‌ كه‌ له‌مێژه‌ به‌رده‌وامه‌ به‌ واتای سزادان و ئه‌شكه‌نجه‌دانه‌، ده‌بێت ئۆجەلان ڕێی پێبدرێت چاوی به‌ پارێزه‌ره‌كانی بكه‌وێت، گۆشه‌گیری له‌سه‌ر هه‌موو زیندانییان په‌یڕه‌و ده‌كرێت و چه‌ندین مانگ ناهێڵن چاویان به‌ خانه‌واده‌ و كه‌سوكاریان بكه‌وێت”.

لە ئێستادا لە باکوری کوردستان مانگرتن لە خواردن دژی گۆشەگیری ئۆجەلان بەڕێوەدەچێت، حکومەتی تورکیا لە 27ی تەموزی ساڵی 2011ەوە رێگەیان بە پارێزەرەکانی ئۆجەلان نەداوە سەردانی دورگەی ئیمراڵی بکەن.

یه‌كێتییه‌كه‌ له‌وباره‌یه‌وه‌ دەڵێت، “گۆشه‌گیری له‌ ڕاپۆرته‌كانیCPT-دا تۆماركراوه‌. جاڕنامه‌ی زیندانییان كه‌ ساڵی 1995 له‌ لایه‌ن نه‌ته‌وه‌یه‌كگرتووه‌كان په‌سه‌ند كراوه‌، جاڕنامه‌یه‌كی گه‌ردوونییه‌ و ساڵی 2015 به‌ ناوی جاڕنامه‌ی نیلسۆن ماندێلا نوێكراوه‌ته‌وه‌”.

ئه‌و ڕێكخراوه‌ی پارێزه‌رانی ئه‌وروپا ئاماژه‌ی بۆ ئه‌وه‌ش كرد، هه‌ر زیندانییه‌ك ته‌نیا ده‌كرێت پێنج ڕۆژ گۆشه‌گیر بكرێت، ئه‌گه‌ر 15 ڕۆژ تێپه‌ڕێنێت ئه‌وا ده‌بێته‌ شتێكی دڕندانه‌ و دژ به‌ مرۆڤایه‌تی.

ڕێكخراوه‌ ئه‌ورووپییه‌كه‌ رونیکردوەتەوە، پێویسته‌ حكومه‌تی توركیا ڕێز له‌ مافه‌كانی زیندانییانی ئیمڕاڵی و زیندانه‌كانی دیكه‌ بگرێت و گۆشه‌گیریی سه‌ر ئۆجەلان هه‌ڵبگرێت و ڕێگه‌ بدات زیندانییان چاویان به‌ پارێزه‌ر و خانه‌واده‌كانیان بكه‌وێت.

تایبەتمەندییەکان: هەواڵەکان

زیادکردنی وەڵام