باڵیۆزی ویلایەتەیەكگرتوەكانی ئەمەریكا لە ئەڵمانیا داوای لە بەرلین كردن رێگری لە هەوڵەكانی ئێران بكات بۆ كێشانەوەی بڕێكی زۆری پارەی كاشی ئێران لە بانكەكانی ئەڵمانیاوە، بەمەبەستی كەمكردنەوەی كاریگەری سزا دارایەكانی واشنتن لەسەر تاران، ئەوەش دوای كشانەوەی واشنتۆن لە ڕێككەوتنی ئەتۆمی ساڵی 2015دا.

ریچارد گرێنێل، باڵیۆزی ویلایەتەیەكگرتووەكانی ئەمەریكا لە ئەڵمانیا ڕایگەیاند، حكومەتی واشنتۆن زۆر نیگەرانە سەبارەت بەپلانەكانی تاران بۆ گواستنەوەی سەدان ملیۆن یۆرۆ پارەی كاش بۆ ئێران و وتی، “هانی بەرپرسانی باڵای حكومەتی ئەڵمانیا دەدەین دەستێوەردان بكەن و پلانەكە بوەستێنن.”

لەو كاتەوەی كە پۆستی باڵیۆزی وڵاتەكەی لە بەرلین وەرگرتووە، گرێنێل ئاشكراتر و ڕاشكاوانەتر لە باڵیۆزی پێشووی واشنتۆن لە بەرلین بۆچوونەكانی خۆی دەردەبڕێت، كە ئەوەش بووەتە جێگەی ڕەخنەی هەندێك لە سیاسەتمەدارانی ئەڵمانیا و بەدەستێوەردان لە كاروباری ئەڵمانیا دەیبینن.

دوێنی دووشەممە، وتەبێژی وەزارەتی دارایی ئەڵمانیا رایگەیاند، تاوتوێی داواكارییەكەی ئێران دەكەن، بەڵام وەزارەتی دارایی ئەڵمانیا هیچ لێدوانێكی نەبووە لەسەر وتەكانی گرێنێل.

ڕۆژنامەی بێڵدی ئەڵمانی دوێنی دووشەممە لە ڕاپۆرتێكدا ئاشكرایكرد، دەسەڵاتدارانی ئەڵمانیا تاوتوێی داوایەكی ئێران دەكەن بۆ كێشانەوەی 300 ملیۆن یۆرۆ لە بانكەكانی ئەڵمانیاداو گواستنەوەی پارەكاشەكە بۆ ئێران.

تایبەتمەندییەکان: هەواڵەکان

زیادکردنی وەڵام