له‌ مێژ بو سیما و سیمبوڵی ئه‌م حیزبه‌ دیار نه‌بوو به‌ڵام له‌میانه‌ی بانگه‌شه‌ و هه‌ڵبژاردنه‌کانی په‌رله‌مانی عێراق به‌ وێنه‌ و پۆسته‌ری چه‌کوش و داس و کاندیدی حیجابله‌سه‌ر که‌وته‌ وه‌ به‌رچاو…

حیزبی شیوعی هۆکارێکی سه‌ره‌کی بوو له‌ مۆبیڵیزه‌ کردنی ئیسلامی سیاسی و نه‌ته‌وه‌ په‌رستی و خۆخزاندنه‌وه‌ی تاک بۆ ناو بنه‌ماڵه‌ و عه‌شره‌ت چونکه‌ هه‌ر له‌ سه‌ره‌تای دروستبونیه‌وه‌ زۆر به‌ توندی باسی له‌ نه‌هێشتنی خێزان و ئایین و مزگه‌وت ده‌کرد، له‌ نه‌هێشتنی خاوه‌ندارێتی تایبه‌تی و نه‌ته‌وه‌ و نیشتمان و پاشان پێویستیی سه‌پاندنی ده‌سه‌ڵات و دیکتاتۆریه‌تی پڕۆلیتاریا و هتد…

له‌ سه‌رده‌می حوکمی قاسمدا، ده‌سه‌ڵاتی خستبووه‌ به‌رده‌ستیان به‌ڵام ئه‌وان خه‌ریکی پڕۆپاگه‌نده‌ی کۆمۆنیستی و وروژاندنی دنیای دژبه‌ کۆمۆنیستی بوون. سه‌ره‌نجام وڵاتانی دژبه‌ کۆمۆنیزم له‌ ناوچه‌که‌ و جیهان قاسمیان لی بووه‌ کۆمۆنیستێکی مه‌ترسیدار و هاوکاری به‌عسیان کرد و به‌عسیش قاسم و هه‌زاران شیوعی کوشت. که‌چی ده‌ ساڵ پاش ئه‌و کوشتاره‌ و به‌ فه‌رمانی مۆسکۆ به‌ره‌یان له‌گه‌ڵ به‌عس دروستکرد، که‌ له‌ ئه‌ده‌بیاتی خۆیاندا به‌ ناشیوناڵیست و فاشیست پێناسه‌ کرابوو. ئینجا شانبه‌شانی به‌ عس شه‌ڕیان له‌ دژی یاخیبونه‌ چه‌کداریه‌که‌ی ۱۹۷٤ ی کورد کرد و ڕێکه‌وتنی جه‌زائریان به‌ ده‌ستکه‌وتێکی گه‌وره‌ دانا بۆ عیراق . پاشان بزوتنه‌وه‌ی کوردیان به‌ (یاخیبونی ڕاستڕه‌و و کۆنه‌په‌رستی چه‌کدار) ناوده‌برد و داوای (پاکتاوکردنی ئه‌و یاخیبونه‌ ره‌جعیه‌ کوردیه‌یان ده‌کرد). هێنده‌ دژی کورد بوون ته‌نانه‌ت پییان ڕه‌وا نه‌بوو که‌ پارتێکی کۆمۆنیستی به‌ ناوی کوردستانه‌وه‌ هه‌بێت. شایانی باسه‌ هه‌ندێک له‌وانه‌ی ئه‌وکاته‌ چه‌کداری ئه‌و حیزبه‌ بوون ئێستا له‌ ڕاگه‌یاندنه‌کانی پارتیدا کارده‌که‌ن.

که‌ سه‌ددام ئاشبه‌تاڵی به‌ بارزانی کرد ئیتر کاری به‌ م حیزبه‌ نه‌ماو به‌ به‌رچاوی مۆسکۆ و پارتی کۆمۆنیستی سۆڤیتیه‌وه‌ که‌وته‌ ڕه‌شبگیرو کۆمه‌ڵکوژییان. ژماره‌یه‌کیان له‌ تاو گیانیان ڕایانکرده‌ ناوچه‌ کانی ژێر ده‌سه‌ڵاتی ینک. که‌ ئه‌مه‌ش واته‌ په‌نابردن بۆ ئه‌و بزوتنه‌وه‌یه‌ی که‌ سێ ساڵ پێشتر به‌ حرکه‌ی ره‌جعیه‌ی کوردی ناویانده‌برد و داوای پاکتاوکردنیان ده‌کردن. له‌هه‌شتاکانیشدا که‌ حیزب و گروپه‌ چه‌کداره‌کان له‌ شاخ بوونه‌ دوو به‌ره‌ی دژبه‌یه‌ک، ئه‌م حیزبه‌ له‌ به‌ره‌ی هاوکاری حزبی ده‌عوه‌ و کۆماری ئیسلامی ئێران بوو.

له‌ نه‌وه‌ده‌کانی سه‌ده‌ی ڕابردوو و دوای نه‌مانی بلۆکی سۆڤییت، هه‌موو ئه‌و پارته‌ کۆمۆنیسته‌ ماریۆنێتانه‌ی که‌ مۆسکۆ له‌ چوارچیوه‌ی کۆمینفۆرم دا دروستیکردبوون به‌ ته‌واوی هه‌تیو که‌وتن. بۆیه‌ زۆربه‌یان نه‌مان و هه‌ندێکیان کارو ئه‌رکی نوێیان بۆخۆیان دۆزیوه‌و هه‌ندیکی تریشیان وه‌ک ئه‌م حیزبه‌ی لێبه‌سه‌رهات .
لینین”که‌ به‌ لینینی مه‌زن ناویده‌به‌ن” هه‌زاران جنێوی دابه‌ ڕۆزا لوکسمبۆرگی ئه‌ڵمانی له‌ به‌رئه‌وه‌ی باوه‌ڕی به‌ ڕیفۆرم و خه‌باتی په‌رله‌مانی هه‌بو. چونکه‌ لینین پێی وابوو که‌ سه‌ندیکاو په‌رله‌مان و خه‌باتی دیموکراسی، کۆمۆنیسته‌کانی خه‌ساندووه‌ و له‌ شۆڕشگێڕێتی خستون. که‌چی ئێستا ته‌واو پاش سه‌دساڵ له‌و جنیوانه‌ ئه‌م حیزبه‌ بۆ دابینکردنی بژێوی خۆی به‌شداری کرد له‌ هه‌ڵبژاردنی په‌رله‌مانی ده‌وڵه‌تی بۆرژوای کاپیتاڵیستی عێراق و هاوپه‌یمانیکردنی موقته‌دا و بون به‌ کوردستانی و حیجابی.

ئه‌م حیزبه‌ له‌ سه‌ر ڕێبازی لینین و ستالین دامه‌زرا و بڕوای ڕه‌های به‌وه‌یه‌ که‌ هیچ بزوتنه‌وه‌یه‌ک نابێته‌ بزوتنه‌وه‌یه‌کی شۆڕشگێرانه‌ به‌بێ تیۆریه‌کی شۆڕشگێڕانه‌ و تاکه‌ تیۆری شۆڕشگێڕانه‌ش بریتیه‌ له‌ ئایدۆلۆجی کۆمۆنیزم…به‌ڵام ڕێره‌وی ژیان و سه‌ره‌نجامی ئه‌م حیزبه‌ ئه‌وڕاستیه‌ی خسته‌ ڕوو که‌ ئه‌مانه‌ هه‌مووی میکاڤیلی گوته‌نی ئامراز بوون بۆ گه‌یشتن به‌ ئامانج…هه‌مووی درۆ بوو بۆ گه‌یشتن به‌ دراو و ده‌سه‌ڵات…

تایبەتمەندییەکان: بابەتی هەڵبژاردە

زیادکردنی وەڵام