هەڵسوڕاوێكی باڵای بزووتنەوەی گۆڕان رایگەیاند، ئەو خەڵكە لە ئەنجامی ئەوە هاتووەتە سەر جادە زوڵمێكی زۆری لێكراوەو ژیان و ئازادی لێزەوتكراوە، “ئەمە سەرەتای كۆتایی ئەم دەسەڵاتە گەندەڵەیە”.

قادر حاجی عەلی ئەمڕۆ لەلێدوانێكیدا بۆ كەناڵی كەی ئێن ئێن رایگەیاند، “موچەی كەمئەندامێك دەبڕن بەڵام هەموو بانكەكانی دەرەوەیان پڕكردووە لە پارە، هەروەها پارەی نەوت هەموو لە دەرەوەیەو خەڵكیش هەموو بێ موچەیە”.

ئاماژەی بەوەشكرد، “ئەو خەڵكەی لەسەر جادەیە لە ئەنجامی ئەوە هاتووەتە كە زوڵمێكی زۆری لێكراوەو ژیانی لێزەوتكراوەو ئازادی لێزەوتكراوە، ئەمە سەرەتای كۆتایی ئەم دەسەڵاتە گەندەڵەیە، دەبێت هەمووان پشتگیریان بكەین لە هەولێر و دهۆك و شارەكانی دیكەش”.

قادر حاجی عەلی وتیشی، “بەهۆی كلتوری سیاسیەوە نەك بەهۆی پیاوەتی حیزبەكانی دیكەوە ئازادی لە سلێمانی زیاترە، بەڵام هەولێر مەعسەكەرێكی گەورەیەو رێگەیان پێنادرێت، بەڵام كە جوڵا وەكو ئەمڕۆ و دوێنێ دەبێت و هیوادارم سەركەوتووبن”.

ئەو هەڵسوڕاوەی گۆڕان ئەوەشی خستەڕوو، “پەیامم بۆ هێزە چەكدارەكان ئەوەیە ئەو خەڵكەی هاتووەتەسەر شەقام تەنها بۆ باشتركردنی بژێوی خۆی نەهاتووە، بەڵكو بۆ باشتركردنی ژیانی ئێوەش هاتوون، دەبێت گوڵ بارانیان بكەن نەك گولە باران”.

تایبەتمەندییەکان: هەواڵەکان

زیادکردنی وەڵام