خەیری بۆزانی، بەڕێوەبەری كاروباری ئێزدییەكان لە وەزارەتی ئەوقاف رایگەیاند، تا ئێستا زیاتر لە سێ هەزار هاوڵاتی ئێزدی ماون و بێ سەروشوێنن، پێشووتر دەوترا ئەوانە لە دەستی داعشن، بەڵام “ئێستا ناتوانین بڵێین ئەوان لەلای داعشن، چونكە داعش لە رووی سەربازی و لە سەر زەوی نەماون”.

خەیری بۆزانی، بەڕێوەبەری كاروباری ئێزدییەكان راگەیاند، “ئێستا هەوڵی رزگاركردنی ئەوان زەحمەتر بووە لە پێش ئێستا، لە بەرئەوەی ئەو بێ سەرشوێنانەی ئێزدی لە ناو خێزانەكانی داعش دان، هەروەك بەشێكی زۆریان لە نێو ئەو خێزانە توركمانە سوننەكانی تەلەعفەرن، ئەوانیش لەگەڵ خۆیان ئەوانیشیان بردووە بۆ وڵاتی توركیا”.

بۆزانی ئەوەشی خستەروو، “لە توركیاوە توانیومانە 11كەس رزگاربكەینەوە و بیانگەڕێننەوە هەرێمی كوردستان، زۆربەی هەرەزۆری ئەوانەشی كە ماون منداڵ و ژنان بە پلەی یەكەم و پیاوەكانیش ژمارەیان كەمە”.

خەیری بۆزانی راشیگەیاند، “ئەوانەی كە رزگاركراون لە دەستی داعش لە بارێكی دەروونی و كۆمەڵایەتی زۆر خراپدان، دەبێـت رێكخراوەكانی مافی مرۆڤ و ئەوانەی گرنگی بە ژنان دەدەن بە تایبەت نەتەوەیەكگرتووەكان رۆڵێكی گەورە بگێرن لە دووبارە ئامادەكردنەوەی ئەو كەسانە بۆ نێو كۆمەڵگە”.

بەپێی ئامارەکا، ژمارەی ئێزیدییەکانی عێراق 550 هەزار هاوڵاتی بووە، کە لەدوای رووداوەکانی ئابی 2014ەوە 360 هەزاریان ئاوارەبوون.

هاوکات هەزار و 239 هاوڵاتی ئێزیدیی شەهیدبوون و ژمارەی ئەو کەسانەی بێ باوکبوون هەزار و 759 کەس و 407 کەسیش بێ دایک بوون و 359 کەسی دیکەش دایک و باوکیان پێکەوە لەدەستداوە.

تایبەتمەندییەکان: هەمەڕەنگ

زیادکردنی وەڵام