“1”
ئەوەی دەستی لە كورسی دەسەڵات گیر بێت زەحمەتە بە ئاسانی دەستی لێ هەڵگرێت. جارێكیان لای كاك نەوشیروانی ڕەحمەتی بووین من پرسیم كاك نەوشیروان ئەوە بۆ فڵان كەس پێش ئەوەی ببێتە وەزیر زۆر پیاوێكی ماقوڵ بوو، تەنانەت نوسەرێكی باشیش بوو، كەچی ئێستا بۆ وا گەندەڵ بووە؟ كاك نەوشیروان وتی كاك عەزیز تۆ دەزانی قەرسیل چیە؟ وتم بەڵێ، گیایەكی ناسكە، گەنم یان جۆ بە سەوزی پێش ئەوەی گوڵ بكات. كاك نەوشیروان وتی: “كە گوێدرێژ دەمی لە قەرسیل گیر بێت بە دار بدە بەسەریدا دەم لە قەرسیلەكە هەڵناگرێ ئەوەندە لای خۆشە، بەرپرسانی ئێمەش وەك ئەو گوێدرێژەیان لێ هاتووە،هەر ئەوەندە دەستیان گەیشتە پۆست و پارە بەدار بكێشە بەسەریاندا واز ناهێنن”.

 

هەموومان بە نوكتەكە زۆر پێكەنین، هەستم كرد كاك نەوشیروان زۆر دڵخۆش بوو بەوەی كە بەدڵ پێكەنین و نوكتەكەی جێی خۆی گرت و هەڵەم نەكردبێت یەك دوو گۆڕانخواز كە ئێستا دەمیان گەیشتۆتە قەرسیلەكە ئەم نوكتەیەی كاك نەوشیروانیان كردە نوسین و پۆستیان كرد.

 

هەر چەند ساڵێك دوای ئەم قسەیەی كاك نەوشیروان، قوتابیە گۆڕانخوازەكانی كاك نەوشیروان لە هەرێم و لە بەغدا و لە دەسەڵاتە خۆجێییەكان، دەمیان لە قەرسیلەكە گیر بووە و بە داری ڕەخنەگران و گۆڕانخوازانیش ئامادە نین دەم لە قەرسیلەكەی دەسەڵات بەربدەن. ئەم نوكتەیەی كاك نەوشیروان بۆ ئێستا بەشێك لە گۆڕانخوازان لە كوردستان و بەغدا دەگرێتەوە كە بوون بە سیاسی قەرسیل خۆر و بەداریش لەسەریان بدەی واز لە پۆستەكانیان ناهێنن و خۆشی لەوەدایە بە هەمان زمانی ڕەخنەی ئۆپۆزسیۆنیشەوە دەدوێن، یان بەشێكیان خانەنشینی ئەو سیستەمە سیاسییەن و بۆ توزقاڵێكیش دەستبەرداری ئیمتیازاتەكانی خۆیان نەبوون.

 

پۆست و پارە زۆر مرۆڤی ناشرین كرد و ئەزمونەكەشی لەگەڵ خۆیاندا نابووت كرد و سیاسەتیان سوك و ڕەزیل كرد و حوكمڕانی و بەڕێوەبردنیان كرد بە گاڵتەجاڕی و ئەوەندەی خەریكی گیرفان و ورگ و ئارەزووە شەخسیەكانیانن ئەوەندە بەتەنگ هاوڵاتیانەوە نین.

 

گوێم لەگۆرانیبێژو بێژەرێكی شاخ و شارو پێشمەرگەیەكی دێرین بو لەناو هاوڕێكانی گۆرانی دەگوت و دەیوت: سەد دارم لێدەن بەداری ڕووسی دەس هەڵناكرم لە بێناموسی.

تایبەتمەندییەکان: بابەتی هەڵبژاردە

زیادکردنی وەڵام