پاپای ڤاتیكان دژی پلانەكانی ترەمپ دەوەستێتەوە بۆ دانپێدانان بە شاری قودس وەكو پایتەختی ئیسرائیل و گواستنەوەی باڵیۆزخانەی ویلایەتە یەكگرتووەكانی ئەمەریكا بۆ ئەو شارە.

بەپێی هەواڵێكی كەناڵی سكای نیوز، پاپا فرانسیس لەمیانی وتاری هەفتانەیدا ڕایگەیاندووە، “ناتوانم لەبارەی نیگەرانی قووڵی خۆمەوە بێدەنگ بم سەبارەت بەو ڕەوشەی هاتووەتە ئاراوە لەچەند رۆژی ڕابردوودا.”

ئاماژەی بەوەشكردووە، “من بە توندی داواكارم لە هەمووان كە ڕێز لە ڕەوشی ئێستای شارەكە بگرن بەپێی بڕیارە پەیوەندیدارەكانی نەتەوە یەكگرتووەكانەوە”.

شاری قودس لەڕووی ئایینیەوە “شارێكی پیرۆزە” و هەردوو ئیسرائیل و فەڵەستینییەكان بانگەشەی ئەوە دەكەن كە قودس پایتەختی خۆیانە، ڕەوشی شارەكە وەكو مەسەلەیەكی كۆتایی هێڵراوەتەوە تا لە دانوستانەكانی ئاشتی نێوانیاندا بڕیاری لێبدرێت.

دوێنێ دۆناڵد ترەمپ، سەرۆكی ویلایەتە یەكگرتووەكانی ئەمەریكا بە مەحمود عەباس سەرۆكی فەڵەستین-ی راگەیاندبوو، بەنیازە باڵیۆزخانەی وڵاتەكەی بگوازێتەوە بۆ قودس ئەوەش وا لێكدەدرێتەوە، كە “ئەمەریكا بەفەرمی قودس وەكو پایتەختی ئیسرائیل بناسێنێت”.

سارا ساندەرز وتەبێژی كۆشكی سپی ویلایەتە یەكگرتووەكانی ئەمەریكا رایگەیاندووە، رۆژی چوارشەممە دۆناڵد ترەمپ سەرۆكی ئەمەریكا بڕیاری خۆی لەبارەی قودس-ەوە دەدات.

ئەو بڕیارەی ترەمپ ناڕەزایی فەڵەستینییەكان و جیهانی عەرەبی لێكەوتووەتەوە و لەو بارەیەوە مەحمود عەباس زنجیرەیەكی پەیوەندیی تەلەفۆنیی لەگەڵ سەرۆكی روسیا ڤلادیمێر پۆتین و پاپای ڤاتیكان پاپا فرانسیس و پادشای ئەردەن شا عەبدوڵا، هەروەها سەرۆكی فەڕەنسا ئیمانیۆل ماكرۆن ئەنجامدا و داوای لێكردن ئەو بڕیارەی ترەمپ بوەستێنن.

ئەو هەنگاوەی ترەمپ پێدەچێت ئاڵۆزییەكانی نێوان فەڵەستین و ئیسرائیل زیاتر بكات، بەو پێیەی فەڵەستینییەكان دەیانەوێت قودس بكەنە دەوڵەتی داهاتوویان و تا ئێستاش كۆمەڵگای نێودەوڵەتی ئەو شارەی وەك پایتەختی ئیسرائیل نەناساندووە.

تایبەتمەندییەکان: هەواڵەکان

زیادکردنی وەڵام