ساڵی 1958 کە مەلا مستەفا لە یەکێتی سۆفیەت دەگەڕێتەوە بەغدا،لە میوانخانەی سمیرامیس دەبێت،کۆمەڵێ پارە دەدات بە ڕەفیق پشدەری کە لای سەڕافێک بیگۆڕێتەوە، وەختێک سەڕاف پارەکە دەبینێت،دەڵێ ئەم پارەیە لەساڵی 1947 وە بەتاڵکراوەتەوە، زیاتر لە پانزە ساڵ مەلا مستەفا دەستی بەسەر ئەو بڕە پارەیەدا گرتبوو بە بێ ئەوەی لە بازاڕدا هەبێت،لە خۆوە نییە دەڵێن”شێخانی بارزان پارە چوە گیرفانیان دەرهاتنەوەی نیە”.

ئەوەبو لە 1975 دا ئاشبەتاڵی کردو دەیان ملیۆن دۆلاری شۆڕشە چەتەگەریەکەی برد لە گەڵ خۆیدا،لەساڵی 1991 یشەوە بنەماڵەی بارزانی بوونە فیرعەونی کوردوستان وخاوەنی سەدان ملیارد دۆلارن.

کەچی تازە بەتازە وەختێک مەسعود لەگەڵ هەندێ کەسایەتی یەزیدیەکان کۆدەبێتەوە دەڵێت “سندوقێک دادەنێین بۆ ئەوەی شەنگال ئاوەدان بکرێتەوە”لە کاتێکدا خۆی و برازاو کوڕو باقی بنەمالەکەی خاوەنی سەدان ملیارد دۆلارن،دیسان دەیەوێت وەک چۆن یەزیدیەکانی داوە بە قڕکردن ئاوایش لە پرۆسەیەکی تردا پارەیان پێپەیدا بکات و ئەوان بکاتە دەسرەی سواڵی،نەهامەتیەکە لەوەدایە خۆی و هێزەکەی شەنگالیان فرۆشت وتازە بە تازە قەول دەدات شەنگال لە داعش پاک دەکاتەوە.

شەنگال بۆ فرۆشرا،کام ئاڵوگۆڕ ؟

ئەوەی کە دەیڵێین ڕاستیەکەو هیچ حاشایەک هەڵناگرێ،وەلێ بۆ دەرخستنی هەر ڕاستیەک،بۆ دەرخستنی هەر نهێنیەک، بەتایبەت کاری مخابەراتی و جاسوسی و پەیوەندیە ژێر بەژێرەکانی ئەم تەرەفانە،مەگەر کامێرایەکت پێبێت کوناوکون دوای بکەرەکان بکەویت،دەنا هیچ بەڵگەیەکی بینراو بیسراوت چنگ ناکەوێت، کە ئەمە ش لە خەیاڵ خەیاڵترە، یان دەبێت چاوەڕوانی دەیان ساڵی تر بکەین تا ڕاستیەکان خۆیان دەربخەن وبچەسپێن،بەتایبەت لەو کۆمەڵگایانەدا کە  مێژوو پارەو لولەی چەک و دەسەڵات دەینوسێتەوە بە قازانجی خۆی،قوربانیەکانیش هەموویان ون دەبن.

بۆ نموونە مەگەر کەسێک ویژدانی فرۆشتبێت و بە ئاشکرا درۆ بکات،دەنا دەزانێت سەردەشت عوسمان بنەماڵەی بارزانی  تیرۆری کرد،وەلێ چۆن دەتوانرێت بەڵگەی بینراو بیسراو کەلە دادگایەکی ئازادوسەروەردا  مافی پێ وەربگریتەوە پەیدا بکات؟یان هەموومان دەزانین مێرگەسوریەکان،دکتۆر شڤان وسەعید ئاڵچی، سڵێمانی موعەینی و عومەر ئاغای سورچی و هەزارانی تر بەدەستی بنەماڵەی بارزانی شەهیدکراون،،کێ دەتوانێت بەڵگەی یاسایی پەیدا بکات؟.

بە پێی سەرچاوەیەک کە تایبەت بۆ چاوی گەل ی ئاشکرا کردوە،کاتێک داعش موسڵی داگیرکرد مەسعود سەردانی ئەو سنورانەی کرد کە هێزەکانی پێشمەرگەی لێیە، دوای ئەویش مەنسور بۆ خۆ گیڤکردنەوە نزیک دەبێتەوە لە سنوری موسڵ، لەوێ دەکەوێتە کەمینی داعش وبەئەسیری دەستگیر دەکرێت،کاتی خۆی ئەم هەواڵە بڵاوکرایەوە، بەلام بە جۆرێک دیزە بەدەرخۆنە کرا،وەک ئەوەی درۆیەک یان یاریەکی منداڵانە بێت،لە کاتێکدا ڕاستیەکی تەواو ڕاستی بوو.

وەختێک کوڕەکەی ئەسیرکرا،مەسعود چۆکی دادا،نەیدەزانی چۆن خۆی لەو تەنگژەیە ڕزگار بکات،خۆ ئەگەر داعش بۆ هەولێریش بهاتایە بنەماڵەی بارزانی لەبەر کوڕەکەیان یەک فیشەکیان نەدەتەقاند،یەکەم هەوڵ پەنای بە تورکیا برد ئەوسا بە ئەمریکیەکان،ئەوە بوو تورکیاو مەسعود بارزانی کەوتنە خۆ،هەریەکەیان بە پێی بەرژەوەندی خۆیان،مەسعود بۆ کوڕەکەی وتورکیاش یاریەکی چەپەڵ کە دوایی بە شەهیدکردنی سەدان گریلای پەیەدەو وێران کردنی کوبانی و دەیان گوندو لەناوبردنی هەزاران یەزیدی کۆتایی هات.

تورکیاو مەسعود بارزانی قسەیان لەگەڵ ئەبوبەکری بەغدادی کرد،پێشنیاری داعش ئەوە بوو کە ئامادەن کوڕەکەی مەسعود ئازاد بکەن بەومەرجەی” ئێمە ئیشمان بە شاخەکانەو ناوچەی شەنگاڵ و لەوێوە بۆ ڕۆژئاوا،کاتێک کوڕەکەی ئازاد دەکەین کە ئەو ناوچەیە تا سنوری سوریا چۆڵ بکرێت،لە یەک ڕێکەوتندا داعش هاتوو هەموو هێزەکانی پارتی کشانەوەو ئەو ناوچەیەیان تەسلیم بەداعش کرد، لەوێوە کوبانێی بە وێران کردن دا جگە لەو قەسابخانەیەی بەسەر خەڵکی شەنگالدا هات،هەموو ئەمانەیش کرایە قوربانی هەرزەکارێکی وەک مەنسور.

بۆ ئەمە تورکیا لەبەیندا بوو،بۆ تورکیا ڕێکەوتنێکی زۆر باش بوو،هەم داعش ناوچەی شەنگال دەگرێت کە کوردن وموسڵمان نین هەم پەیەدەو کوردانی ڕۆژئاوا تەسلیم دەکەن بەخۆیان و کوبانێ وچەندی جێگای تریان داگیردەکەن و کانتۆنەکانیان دەڕوخێنن،بەڵام  نەتییجەکەی ئەوە بوو کە داعش  سەرکەوتوو نەبو،ئەوەی لەو نێوەدا قازانجی کرد مەسعود کە کوڕەکەی گەڕایەوە،تورکیا کە توانی کۆمەڵێ مەرامی خۆی دژی ڕۆژئاواو پەیەدە بەدەست بهێنی، ئەوەیشی کە زەرەری کردو بووە قوربانی یەزیدیەکان ناوچەی شەنگال و پەیەدەو سەدان شەهیدو  وێران کردنی کوبانێ بوو.

 

تایبەتمەندییەکان: هەواڵەکان

زیادکردنی وەڵام